Тасу’ яв’ тер’’ я’’авлыць

Ты пэрти’’ сянакова яля’’ округханана’’ ӈули’’ паӈодо’. Хусувэй си’’ив ныланава’ яляхана ханяхавахана мюсерта’’ малюрӈа’’. Ӈоб’’ си’’ив’ тяхана Хальмер’’ Седе’’э’ хардахана хойхад товы’’ ӈобт’ тэворӈаць. Таславы яляхана Тасу’ яв’ салаба ненэцяӈгат пан’’ӈась.

Время для чтения ~ 3 минуты

Нерни няна няхар’’ ненэця’’ нидо’ нертемба мядо’’ няю’ сюрамби’’. Сидя ю’’ мядм’ нито’ таха ядан’ ӈобт’ мярвы’’. Мяд’’ хуркари’’: хэхэн’ пунрёди’’, тэри сяйман’ харвани’’, лаха’ хэвнякуна ерво’’ ед’ таславы’’ мяры’’. Ет’ ханяри’ мирци’’ хибяри тюсь пирӈада. Мяд’ мюня’ ядемби, тольто’ ний’’ ӈаврахат пан’’ӈа’’. Не’’ толь’ ни’ халя, ты’ ӈамза ӈаябад пэрӈа’’. Ханяӈы’’ тюӈгасеты’’, ӈани’’ пин’ ӈадиберӈа’’.

Нердена яляндо’ хубтахана пирдырма’’ пэйдаць. Тецьбата ӈод’’ ялянда сэв лимбикавна пайды’ ни’ ха’’морӈась. Панытана’’, мальцятна’’ тарця нумгана таӈгаць. Сяхаринда нюртейӈэ ӈынхана енерцеты’’. Теда’ ӈод’’ харвана’’ енерманзь нито’ пуд нулаӈгаць. Сямянхат па’’мядо’ — Тэмеро Ядне ӈэвысь, ӈобкартм’ нись ӈэдара’’. Нянда пуд Григорий Ядне еремясь. Тибичи Геннадий няхаромдэйсь. Тикы’’ нито’ ядхана ярколаць. Харта ӈод’’ тэхэ’’на мэнаха’’на ярколава ехэрана сер’’ вуни ӈа’’. Тынзяӈо ня’’амбада’’ манзеты’’: «Нявотана тым’ яркыба ханяцей сава. Тэри паллёда тюр тоенана’ то’’олха». Хасава’’ ӈэдарадо’ яӈгусь. Сямянхат сававна Игорь Лапсуй ярколавы. Няданда ӈамгэ’ пирувна Марк Лапсуй хаись.

Тэхэ’’на подермы хано манэ’’ӈаваць

Сидяӈг: Марина Яр’ тадтавы

Хусувэй сянакова’ яляхана тэхэ’’на подермы хано манэ’’лабтамбасеты’’. Тасу’ явхана ӈобтикы тарцясь. Юд’ мян’ хан’’ нито’ пуд вэрнаць. Нито’ нерня ненэцие’’ ся’’амна Николай Хыльчивич Ядне ханамда вадась. Пыда Ӈоя’ вымна мюсерӈа. Пухуцянда ня сидндет нюм’ вадаӈаханзь. Теда’ хэвхананди’ нюти’ ню’’ сюрберӈа’’. Илебей ненэця’ ӈэванда мальӈгана пирдырма’ яляхана мале сян’ нерня’ ха’’морӈась. Теда’ ӈани’ нявоталаӈгурӈась. Пуда тандая’ несӈэ хэвэхэ’ Арсений Яптунай няби Августа Яр миӈаханзь. Пыди’ сянакова’ яляхана несӈэ хэванди’ няю’ падроди’ сертэйдинзь. Пухуцяда ханда вэ’ няна ӈамдысь.

Нито’ поӈгана ханм’ Илья Васильевич Яндо вадась. Хардахана илебата ӈод’’ мюсерта нида нядаба невхы иланда саирм’ нида юрыбю’’. Тэдамда хахаяда мякад сава няхатата хосаявысь:

— Маня’’ ханярина илебана’’ ӈод’’ невхы сэвна’’ сыло’’ма илма’’ нива’’ юрыбю’’, етри’ тэн’, вынд’ сэвна’’ сырӈа’’. Теда’ тарця вато’’ таняхаваб’’, ты’’ тарабцом’, ила’ саирм’ нерня’ минревам’ етри’ манэ’’лабтамбива’’.

Автор: Марина Яр’ падвы

Авторы

Няръяна Нгэрм

04:30, 06 апреля 2026

Темы