обновлено: 10:07, 13 июля 2023
Няръяна Ӈэрм
Таӈы ныланава
Сырэй иры’’ пуд хусувэй ненэць’, неноховавна ӈэрм’ я’ няна илена’’, таӈы нуво ёльце ӈатейдо’. Едэй по’ пуд та’ ханзер’’ ныланавамдо’ мале тасламби’’. Тохолкода’’ ӈацекы’’ ӈобтикы нерняӈы ялэдо’ ӈате’’, ненэйвана няхатато’ ва’’лёй хой’ няна илена’’ по’ ямбан’ вы иландо’ нямна идо’ ядэрӈа’’.
Время для чтения ~ 2 минуты
Варӈэ’ иры’ ёльцьӈгана мерку’ мякандо’ ханавандо’ е’’эмня ӈацекы’’ нисянадо’, небянадо’ паромламби’’. Ты пэртя’’ сянакова’ ялэ’’ пуд ӈока хибям’ вынд’ нисянадо’ харто’ мякто’ ханасетыдо’. Хубтахана ӈэда ӈэсыхы’’ тиртя ӈанохона тэврамбидо’. Иле мэта мякнандо’, интернатхана, экзамен мипда’’, таддикахад тю’’у’ няю’ ядембада март’ ныланаванзь ятнанари’’ хаюрӈа’’. Хусувэй по’ ӈацекы’’ ядембада ямд’ ӈэдалёрӈа’’, ӈанидо’ Красноярской крайхана ӈэда ныланава’ мят’ ӈэдабтамбидо’. Ныланавандо’ е’’эмня федеральной, краевой еся ӈадимдемби’’.
Нюртейдо’ ты’’ ниць иры’ пудана яляха’’на Париденя ям’ няю’ ӈэдалэйдаць. Маӈгты’’ иры’ пудана яляхана ӈани’ мат’’ ю’’ ӈацекы’’ ныланаванзь хаяць. Пыдо’ тет юкад вата сидя яля’ «Солнечный» нюбета крайханана’’ ӈэда лагерьхана ныланаӈгу’’. Ханяӈыдо’ мято’ тер’’ ӈока, варючи’’, евако’’ ӈацекэця’’ таня’ ханӈа’’.
Тикы’ хавна паднава’ по’ ёльце’’мяхад, ӈани’’ тохолкода’’ иры’ ямбан’, школахана ӈэда лагерьха’’ ядэрӈаць. Ӈацекы тохоламбада’’ хуркари илека серо сертабиць, музейха’’, толаӈгулава’ мят’ ядэлэйдонзь.
Хой’ тер’’ нидо’ теда’ таӈгам’ ни’’ мэс’’. Таӈы ирыхына манзаядо’ ӈока, мято’ тер’’ нядаби’’. Небянато’ хэвхана мэва нянандо’ ёльце сава, саӈговота манзаям’ ни’’ пилюс’’. Тыто’ поӈгана та’ ямбан’ подёдамдо’ нэкалпаӈгу’’. Таӈэ ялэдо’ понхарт’ мэта то’’олхыдо’ ни’’ ӈэӈгу’’.
Елена Ямкина’ падвы
