Няръяна Ӈэрм
Таӈы ныланавадо’
Ямал’ тиӈгэвна луца падаркана таӈы ялэна’’ пэяд’’. Маня’’ ненэй ненэцяӈэ тодо яхана илева’’. Илма’’ ханяӈэхэна ӈули’’ яӈгасеты.
Время для чтения ~ 3 минуты
Пэдари’’ някуна мюсерта’’, нядэна’’ нина’’ мале сырадо’ холкавы. Нарэй хаерако лохортако еси’’, хасрё’’ ня’ танабида. Нув’ няра лакри’ пармсеты. Нердена сарёкоця ям’ илебтемба варемда мэць хурнасеты. Яна’’ пэдарако янамбовна илелъй’’. Нердена неняӈгаця’’ тияд’’. Салабава’’ ӈани’ мюсе. То’ сэркав’’ тамнарка’’.
Ӈэрм’ я’ някуна илена’’ вы’ тер’’ тарцяхат тамна ехэра’’. Нарэй сырадо’ тамна пере. Ӈодь варёкоця’’ ӈадибелыд’’. Маӈгты’’ ирыхына Сёяха’ няд турмы нина’’ вадавна, я’’авлада хад’ янхад тиртя ӈанодо’ Салехард’ няд няюндо’ тось я’’амвэда.
Харад’ терхав’’ мале таӈы ныланавамдо’ пя’’. Ненадовна ӈацекы’’ маймби’’. Ядембада’’ ё’’ ня’ ханӈа’’. Едэй илаӈгана небянадо’, нисянадо’ нюкцидо’ таӈга ӈэдабтамба пиръядо’.
Ӈопой нем’ лахана няӈаваць. Пыда не нюмда нюртей мэва ӈопойӈэ ӈэдаравэда.
— Мань етри’ тосасетыдм’, ихинани манзетыдм’: «Ханзер’’ ӈопойӈэ лагерьхана мэӈгу? Ӈэбтода хибя тимбаӈгуда, хибя танёпаӈгуда? Ӈэванда тар’’ ямб’’, ядембадахана нёхонаӈгу. Имбытадода ханзер’’ халтамбаӈгуда? Варцавэйӈэ ни ядэрт’’?» Тюку по’ не нюми мале ӈарма. Юкад вата сидя пода. Харта ӈэбтода паӈгалма тенева, нюдя ӈаворикуда харта халта пиръяда. Тикы’ хавна ӈули’’ ӈопой ни ӈэӈгу’’. Сянако няда ӈобтикы таняна мэӈгу. Тарабнанда ниди’ нядабаӈгуху’. Ӈадьбяни лагерьт’ пада таслав. ЯНАОтдых нюбета проект’ сер’ падрода сертадм’. Тикы’ пуд сидна’’ етри’ табедамби’’, тидхалемби’’: «Ӈамгэм’ пада тара, ӈацекэхэни хурка ӈаворидамда хамеда серо’’ӈа». Таславы яляхана билетадамда тэмдадм’. Ӈаворида ма’’ламба пяни’. Сомбовна табедав: «Ӈарка нит мунд’ инзеле’’, сехэры’ поӈгана ӈани’’ няхатат нён хаюр’’». Маӈгты’’ иры’ нябимдей яля’ ӈацекы’’ тиртя ӈано’’ ӈамдолавахана ма’’лы’’. Сидто’ маниена’’ ӈарка нядо’ няхар’’ ӈэвы. Лагерьхандо’ ӈэдалёвандо’ ямбан’ телефонхана етри’ няна’’ падна’’, сидяӈг ӈэдабтамби’’. Ими ӈули’’ таӈгась. Нюни нямна нидм’ тоса’’. Ныланава’ яханандо’ ӈобтикы хусувэй ялямда теневадм’. Интернет’ мутравна «Юбилейный» нюбета лагерь’ манзарана’’ падна’’: «Юркыва’’», «Ӈорӈава’’», «Сянакурӈава’’», «Падирӈава’’», «Хыноӈава’’, тарава’’», «Экскурсияхана мэва’’».
Ти, тарем’ ханярина нюртей таӈы ялэна’’ миӈа’’.
Автор: Г. Окотэтто’ падвы
Авторы
Няръяна Нгэрм
Темы