Няръяна Ӈэрм
Тэхэна’’ мансԓани’’ дяԓя
Дюԓкат ва’та ты’’ кан’’, шича’дюкат ва’та ненэй мя’’. Пуровский районхана тэхэна’’ мансԓани’’ дяԓям мэӈаш’’. Поӈкнантуӈ мянаԓмантуӈ мэт Таԓкан шанат дяхат мэна’’ неша’’ ӈомаш’’. Шича дяԓяӈ дямпан праздник’ миндяш.
Время для чтения ~ 5 минут
Таԓкахана ты’’ падеԓьш мансԓани’’ дяԓям Пякупур нимита дяхаӈ няна, Пуровск’ няӈ ӈайта пуԓ ӈыԓна мэӈатоньш’’. Праздникан томы’’ хомана ныптакомаӈ мэты таняӈ ненэй мяту’’ меӈаш’’, куԓкаԓи’’ ӈамыдю’’ шеԓтаӈаш’’. Ӈэԓм’ чеԓ’’ нешаӈкна’’ ты’’ падеԓьш мансԓани’’ дяԓя — пиԓи хома праздник. Чики дяԓяхана неша’’ куптат ниня манымайтуӈ нетуӈ, диԓюнатуӈ кошту’’, няханатуӈ дёԓимяшошту’’, поӈкнатуӈ шанако мянаԓьшту’’.
Праздник’ мээԓмантуӈ неԓьня культурахана мансԓана’’ ванԓат, нешади’’ дилыӈ нямна ӈайта, ӈычимчеӈаш’’. Чикиӈ пут праздникан томы’’ неша’’ кан’ну’’ дет ӈайта парад маныдеӈаш’’. Чуки похона ӈопшеԓы парадхана шича дю’’ шеcв’ тыӈ кан’наш’’. Канутуӈ ӈычимчемпюта’’ мюшинатԓям ӈуп пумна миньдяш’’. Тытуӈ топдяма’’, канутуӈ чеԓ’’ дёԓьше мэкат’’. Чикиӈ пут, праздникан томы’’ веԓв’’ нешади’’ поздравийпёш мунуӈаш’’. Чикидю поӈкна Ямална ӈаԓка тэта тадямэӈаш. Куԓкаԓи’’ хома вачи’’ выӈкан мэна’’ нешаӈк мэӈаш’’.
Няматаԓакуԓма дяԓяхана мат’ командам шеԓтаӈаш’’. Поӈкнатуӈ мянаԓмантуӈ мэт Каԓпюԓкат, Каԓясамэхэт, Самбуԓкахат, Ханымейхат, Таԓкахат, Сугмуто-Пякутинская общинахат мэна’’ тоӈаш’’. Шича дяԓяӈ поӈкнатуӈ мянаԓяш’’. Чуки похона дюԓкат ва’та тыӈкан няматаԓакуԓяш’’. Неԓьчеэй дяԓяханантуӈ няматаԓакуԓта’’ масс-стартан ӈомаш’’. Нуп диԓьшуӈ мансхаԓяш’’. Таньше ӈуп диԓьшуӈ ӈайтаԓёма неньшаԓ ниӈа, куки ты’’, ӈука нешади’’ маныдеш, шехеԓэхэт шуԓхаԓьштут. Хомана ӈайтаԓёмантуӈ мэты неша’’ тытоӈ неԓьшут кан’ видян тохоԓаштутуӈ. Таньше ӈайтаԓёш мянаԓчи’’ поӈкна ӈайвахай местам Таԓкахат мэна Филипп Пяк канаӈата. Пыта неԓьня финишан тоӈа. Ӈопумана ӈайтаԓёта’’ касами’’ поӈкты Алексей Киприн меԓ тоӈа. Ни’’ поӈкат тыӈ кан’хана ӈайтаԓёш ӈайвахай местам Алена Киприна канаӈата. Шича дяԓяӈ дямпан мянаԓта’’ шана’куш’’: няхаԓ ха’мхана ха’муԓяш’’, нэхэԓумпиш’’, шалди’’ ӈыԓна нюмкупёԓьш нетуӈ конуԓпиш’’, кан’ну’’ нимня ха’муԓяш’’, няԓяӈ паӈк вяԓкуԓпиш’’, этно-биатлонхана шуԓьвиш мянаԓяш’’. Мянаԓта’’ командный соревнованихина пытатуӈ конуԓпёмантуӈ камна, каԓьтуӈ детуӈ мянаԓя’’. Чикиӈ камна нешади’’, капиди’’, ӈысми’’ мят чеԓ’’ ненэй паныдётуӈ конкурсхана ӈычимчимпиш’’. Куԓкаԓи’’ матамэй’’, меԓьмана шеԓтамы’’ паны’’, пема тадяӈаш’’. Ӈалка нетуӈ мянаԓтан ӈашки’’ ӈупчики нэхэмтуӈ, нюӈк ӈаймямтуӈ конуԓпиш’’. Кану’’ ха’муԓпиш’’, няхаԓ ха’амхана ха’муԓяш’’, нэхэԓумпиш’’, вяԓкуԓоԓяш’’.
Ныптакош томы’’ хыниԓмаӈ мэт культурахана, спортхана мансԓана’’ куԓкаԓи’’ мероприятии’’ шеԓтаӈаш’’. Праздникхана Пуровский районхат мэна’’ артисту’’ камна Бурятихит мэна национальный ансамбль «Ангара» тадямэӈаш. Нешади’’ дет тонԓюта центрхана мансԓана’’ кынучи’’, таԓани’’ дет ӈайта вильта мероприятии’’ — «Танцует Север», «Напевы тундры» шеԓтаӈаш’’. Ӈэԓм’ чеԓ’’ нешади’’ ӈамԓу’’ дет ӈайта «Вкусное наследие» нимита мят меӈаш’’. Таньняӈ чуниԓта’’ куԓкаԓи’’ ӈамԓу’’ конуԓяш’’.
Чикиӈ камна «Шатута ни» нимита конкурс шеԓтаӈаш’’. Хампԓяӈк ни’’ мянаԓяш’’. Ты’’ падеԓьш мансԓани’’ праздникхана чет’ нешаӈ мят чеԓ’’ ӈопт каймямтуӈ дяԓямтуӈ мэӈаш’’. Чуки похона праздник’ хомана вильӈаш. Шанат вильта спортивный мероприятии’’ тадяӈаш. Хыԓаӈ ниня мэта волейбол шеԓтаӈаш, парашютхат хамуԓта нумна чиԓяш, мотоцикл мэта вильта шоум шеԓтаӈаш’’.
Тыӈ канхана ӈайтаԓё ӈайвахай местам’ канамы’’, шана’ко мянаԓьш нэхэԓмы’’ тотуӈ миԓита’’ мячисы’’ ня’амӈа’’. Чуки похона мянаԓмы поӈкат ӈайвахай местам ӈай Самбуԓкахат мэна команда канаӈата. Нимимты местан Каԓпюԓкат томы’’ ка’амдят, няхамты места Каԓясамыӈ чеԓ ӈутахана’’ кадя. Чики дяԓяхана Пуровский район’ чеԓ’’ куптаӈ мансԓамы нянтуӈ Мария Леонидовна Климова медаль «За вклад развитие Ямала» няаммаӈ дет майпиш. Мария Леонидовна дилта дямпан, чет’ дюкат ӈука пуӈ Ӈэлм’ чеԓ’’ нешади’’ дилм чуув падеԓьш мансԓаӈаш. Четаӈ тамна Пуровский район чеԓ нета’’ нятапита.
Чики дяԓяхана праздикан томы’’ хомана ныптакуш’’. Кимя праздникан ниша кай’’, чики неша’’ няматаԓакуԓма дяԓям ӈупчики маныдеӈатоньш. Пуровская медиагруппа шича дяԓяӈ дямпан трансляцим’ минԓеӈаш. Куше чики праздник’ мэсумам Пурмедиа эфирхананта, соцсетьманата ӈычимчеӈаташ. Няматаԓакуԓма дяԓям «Народы Арктики» нимита региональный проект’мана минԓеӈатоньш.
Автор: Лариса Айваседо патмы.
Авторы
Няръяна Нгэрм
Темы