обновлено: 04:32, 14 марта 2024
Няръяна Ӈэрм
Теневабцодо’ манэсармы’’
Ӈарка классаха’’на тохолкода’’ Ямальской район’ тер’’ ӈацекы’’ харто’ вадавнандо’ ӈэда олимпиадам’ падвы’’, теневабцодо’ манэ’’мы’’.
Время для чтения ~ 2 минуты
Панаевскхана юдимдей классахана мэна не ӈацекым’ хонрамбидамзь. Ольга Яптик тарця вади мэ’’ӈась:
— Сертабада манзаява’’ мале ӈокась. Школахана тохоламбавына’’ тензебтембиваць. 10-11 классаха’’на мэнаӈэ ю’’ манзаям’ пирдалембиваць. Лексикам’, словообразованиям’, грамматикам’, стилистикам’, фонетикам’ теневабна’’ таравысь. Вадаха’’на ударения ӈабтамбива’’, междометия пюрӈава’’. Паднана’’ ненэцие’’ стихотворения, лахарё толабиваць. Луца’ вадавна ӈэда лахарём’ ненэця’ вадавна падыбиваць. Ӈопой иле’’мя’ нямна ина’’ ядэрабцо хэтыбиваць.
Тикы пирдырмахана Россияна’’ тиӈгэвна илена’’ мэвы’’. Якутия’ няна манзарана’’ М.К. Аммосов’ нюмам’ мэта университет’ тер’’ нябимдей по’ серта таславэдо’. Нюртей пелямда интернет’ мутравна сертабавэдо’. Нямэхэна сидя ю’’ няхар’’ ӈацекы Ямальской районхад паднавы’’. Теда’ тикэхэт нерня’ хэвыдо’ пирдырмы’’. Ӈокханда 19 тохолкода ӈэвы.
Пирдырмам’ сававна падвы’’ яӈга ненадумда’’ми ня’’маӈгу’’. Тикахад тамна’ тяха’ тохолкованзь хэбто’ олимпиадахана мэ’’мадо’ сиддо’ ӈарковна нядаӈгу.
Автор: Анна Яптик’ падвы
