Няръяна Ӈэрм
Тёраридо’ миӈаць
Мань сяхаринда ӈэдалёванди манэ’’манзь паромбасетыдм’. Нертеӈгурти маниевахав хибяри хибяхана сямянхат илека сер’’.
Время для чтения ~ 3 минуты
Тюку по’ самляӈг ю’’ мат’’ хасава ханм’ мэтась. Небойнда тотрев’ ӈоб’’ мандал’’ӈэ нидонзь ӈэдарамбю’’. Ӈоб’’ харад’ ӈыламна хан’’ӈась, тыяркась. Нерня’ няхар’’мана ӈэдарамбидонзь. Пуна ты пэртя’’ вабцадо’ сахамаць, тарем’ тёры’’ӈаць: «Сидя’’мна хан’’ӈая’’!» Тэдормасавэй’’ пэрмандо’ пуд сиддо’ намдаць. Тикахад тыдо’ сятаня’-маханя’ сюрахалаӈгаць. Ханяӈы’’ ӈобт’ теберӈаць, ханто’ нид мантырӈаць.
Пэ’’ нямна мюсерта’’ ӈокаць. Тыдо’ ёльце мэбе’’ӈаць. Лабкамда сюрте’’мяхаданда Вадим Вануйтахад тарем’ лаханась:
— Тым’ тохолавада тоена. Нензаминдями мале пон’ тохоламбивась. Харад’ понд’ тэвавандо’ сер’ ты’’ сейсялворӈа’’. Ӈадьбята ханзер’’ хэвар пунси. Теда’ тыни выдараркаць, пелейми тархалэй’’, халмана миӈадм’.
Не’’ ӈани’ пир’’ӈадо’
Нябимдей яляхана не’’ ӈэдалыць. Сянакода’’ нехэ’’ сырма тамна нюрцям’ ӈэвысь. Нунаӈэ хэвувнана’’ тёркоридо’ хан’’ӈаць. Тыдо’ тидхалемба вэсакудо’, нидо’ нядаӈгуць. Нянандо’ хан’ ни’ мэёвна тись, ӈэва’ иням’ ӈудан’ пэбта, лакри’ ла’’миде тарась. Ханяӈыто’ ты’’ мун’ мян’’ ниць ӈа’’, хэвняцей’’ ервамдо’ ханасетыдо’. Нуна’’ ӈобо’’ манзеты’’: «Тикэхэвар мяканда пяда». Хананда ӈылна хаёвы сяялысь. Мале пон’ сита тыда нюдерӈаць. Мара’’ нядаӈгода’’ таминдо’ тоць. Тэри сыртахартаха’’на тосакабтысь. Нулта я’’мана’’ ненэцие’’ няри’’ нявота хан’’ӈаць.
Хусувэт ӈэдалёда’’ не’’ поӈгана едэйвана пэвы’’ таняць. Нюртей’’ тарем’ пирдырмы нехэна лаханакудамзь. Я’ мал’ няд ядэрта Мария Худи тарця вади мэ’’ӈась:
— Ханм’ мэсо’’мами хубтемя. Нерня’ ӈули’’ сейми пинась. Мер’ нявотана ты пилю’’ӈадамзь. Лабакм’ саць ӈахакумна сюртевась.
Михаил Лаптандер Лаборовой тер тыда сямянхат мере’’мы. Снегоходм’ пыда ханадась. Станислав Пиналей Ӈыд’ няд ядэрта ӈодькоця няхаданда хаись. Няхаромдэй ян’ Пэ’’ тер Александр Тайбери ха’’мыць.
Нехэт Галина Ӈокэй са’’ӈась. Пунда ня’ Аксаркахад ӈэда Нина Лаптандер еремясь. Наталья Тысия няхаромдэйӈэ тэвыць.
Автор: Анна Яптик’ падвы
Авторы
Няръяна Нгэрм
Темы