Няръяна Ӈэрм
Тюнтаӈговам’ мэ’’мы’’
Тюку илаӈгана илебей ненэй ненэця’’ тюнтаӈговамдо’ ханярина мэць пирӈадо’. Ямальской районхана ненэй мяд’ мюня тюнтаӈго пявэдо’. Тикы’ няю’ Яр-Саляхад ЗАГС манзарана’’ Сёяха’ няю’ нюртей тарем’ ӈэдалёрмы’’.
Время для чтения ~ 2 минуты
Кирилл Яптик няби Воттане Вануйти ниди’ ӈацекы ӈэванди’ мальӈгэхэд теневыди’. Мядодо’ ӈоб’’ хэваркахана ӈэвыць. Выӈгана та’ ӈобт’ ӈэсормы’’. Самляӈг по’ тяхана Воттане Саляӈгардахана тохолковы. Та’ мальӈгана ниди’ хамзахалмэхэ’. Небо’ сие ниць ирыхына интернет’ мутрам’ няд’’мяць «Госуслуги»‘ сер’ нерняӈы иламди’ ӈобкана минреванзь падарм’ ӈэдаравэхэ’. Тенкана харти’ мяд’ терӈэ хэвэхэ’.
Тюнтаӈговамди’ мякаданди’ хахаярка ӈэда яхана, Сёяха хардахана мэ’’мэди’. «ЛЭЁ» нюбета организация’ тер’’ сидти’ сававна нядавы’’. Тарем’ ненэй мякана ӈобт’ падна’’ма’ падарти’ ня’’амвэхэ’. Теневана’’, харе’’ ниди’’ мядо’’манзь товы’’. Нядандо’ ӈока лимбика вадам’ намдавэхэ.
Ненэй няхаюна’’ ӈобанзер’’ хынёси’’ илеяха’. Ниди’ хусувэй серкана нядабаяха’. Ӈэрм’ тер’’ ненэцие’’ ила’ саирм’ нерня’ нюхути’, нюти’ ню’’ ӈэсонд’ нёдамди’.
Солне Окотэтто’ падвы
Авторы
Няръяна Нгэрм
Темы