Няръяна Ӈэрм
Тохолкова’ серо тасламбавы’’
Иринато’ ила’ саирм’, вадидо’ тохоламбада’’ ӈарка тасалковам’ мэ’’мы’’. «Реальность этноса» нюбета конферециядо’ ӈэвы. Санкт-Петербург март’ тодо яхат товы’’ ненэця’’ А.И.Герцен’ нюмам’ мэта университетхана ма’’лёвы’’.
Время для чтения ~ 3 минуты
Неноховавна тохолкова’ серо’’ нямна лаханавы’’. Ямал’ тер’’ мале ӈокаӈэ таня’ ӈэдалёрмы’’. Ненэй ненэцяӈгат Эдуард Хабэчевич Яунгад вадамда мэ’’мы. Пыда. выӈгана мюсерта’’ ӈацекы тохоламбавам’ ваде’’мы.
— Ямал’ тиӈгэвна ӈокханда ёнаркад вата’’ нюдя’’ ӈацекы’’ иле’’. Школан’ тамна хэвдавэй’’. Нисянато’, небянато’ хэвхана вымна мюсерӈа’’. Ханяӈы’’ мале небо’ школан’ товандо’ нерцюна, мяканандо’ мэвандо’ мальӈгана тарана теневабцодамдо’ тохоламбиць. Школахана ӈэванда илаӈгандо’ хамекурӈаць. Пыдо’ «кочевой садикхана» тохолкурӈа’’. Ӈарка ненэцие’’ хавна некыдо’, нябакудо’ сидто’ тохоламбадаӈэ тарасеты’’. Тикы’ е’’эмня яӈга тохолкосеты’’. Округханана’’ «кочевой группа»‘’ мале ю’’ школа-интернатхана таня’’. Ӈацекы’’ ханярина илебато’ ӈод’’, школан’ хэвандо’ нерцюна хамекобто’ сава.
Виктория Васильевна Валенкова невхы нюбе’’ нямна вадамда мэ’’ӈась.
— Ярабц’’, сюдбабц’’, невхы сё’’ иринана’’ илам’ ваде’’ӈа’’. Таняд ӈока ӈамгэм’ тасла пирӈава’’. Ненэцяӈг’’ теда’ ӈопой мэкад серм’ ваде’’ӈадамзь: ханзер’’ ӈавнанда ӈопой мяд’ тер’’ нидо’ нюмдебавыдо’. Маня’’ илаӈганана’’ ӈобтикы тарця. Мань ненэй нюмами Ерчне. Няхатани сямянхат ӈаркадм’. Ӈадьбята мяни тер’’ мань нюмгадани пере’’. Папакоми — Ерчне’ папа, хадами — Ерчне’ хада, небями — Ерчне’ небя, ненэй нюмами теневана’’ тарем’ хусувэй нями нюмдеби’’.
Тасалковы ненэцие’’ поӈгана тамна ӈопой теневана нява’’ мэвы. Тикы Тусида Светлана Ивановна. Инзелена’’ няданда ханзер’’ закон’ вато’’ саир ненэй вадан’ луца вадахад падыбавам’ намдавы’’.
Институтхана манзарана’’, студент’’ мядондито’ е’’эмня тохолкось хардандо’ мюмна ядэлавыдо’, музейханандо’ выставкам’ сертавы’’. Тикы’ хавна тодо тэнз’’ ненэцие тарабцо ӈадимдевы’’, хыномы’’.
Тарця сер’’ тодо яхана илена’’ ӈэрм’ терха’’ ёльце ӈарка таром’ минре. Ӈобт’ тэворпана’’ няхатана’’ сава табеко намдабана’’, тоенана манзаина’’ сибда мэтына’’. Тарем’ ӈобкана илна’’ саирм’, вадина’’ лэтра пиртава’’.
Автор: Г. Окотэтто’ падвы
Авторы
Няръяна Нгэрм
Темы