Няръяна Ӈэрм
Тохолковадо’ ӈани пэй’’
Нямэхэна ӈэрм’ тер’’ ӈацекы ненэця’’ «Коммуникативная площадка» нюбета проектхана мэць. Тамальӈгана хуркари проект сертаць. Ӈопойдо’ «Клуб89». Хаби’’ тэнзм’ мэта Дмитрий Кельчин ӈадимде тасладась.
Время для чтения ~ 2 минуты
Теда’ тикы серто’ мале минре пядо’. Тандая’ ӈани’ ӈобт’ тэвыдаць, нюртей ма’’люрмадо’ «Культурный центр «Наследие» толаӈгулава’ мякана ӈась. Дмитрий ӈэрм’ тер’’ нида нерняку пэрӈа, илаӈгана тарана ӈамгэхэ’’ тохоламбида. Тарем’ Саляӈгардахана тохолкода’’, манзарана’’ теневабцодо’ ӈокамдаӈгу’’, хуркари серо няби манзаи минрена’’ ненэцяӈга’’на лаханакурта’’. Ӈобкана нерняри’ ӈэӈгу’’, яндо’ тиӈгэвна юнетаӈэ ханда’’.
Нюртей ӈобт’ тэваваханандо’ нидо’ торомдамбиць. Харто’ пыхыдато’ нямна лаханаць, хибя ӈэвамдо’, ханяна манзаравамдо’ ваде’’ӈаць. Тохоламбдадо’ «Актёрское мастерство» нюбе’’ӈась. Сиддо’ Надежда Валеева тидхалембись. Пыда Центр детского творчества «Надежда» манзарана. Ӈацекы’’ режиссёрӈэ няби педагог-организаторӈэ тарана.
Мэкад сянакубц нита е’’эмня хамэдавысь. Ӈопой вадам’ маймба, нена, пысамба хэта серо’’ӈась. Тарця ӈаво манэ’’лабтамбава ӈани’ нензел’’ нивы ӈа’’. Ханяӈы’’ ӈули’’ пир’’ӈадонзь, сядоларёда’’ ӈани’ таняць. Таддикахад тарабцо манэ’’лабта тарась. Маймба, сядоларё, тырцана таравам’ манэ’’лабтамбиць. Пуна пудана вадамда мэ’’ӈась. Ма’’нисяв, поӈгананда’’ Яляне Лаптандер сямянхат харбёсь. Пэдава ӈэванда е’’эмня нянда книгам’ митадм’.
Тад тованда ныланава’ яляхана ӈани’ ма’’лёда’’. Ӈокханда ю’’ яӈорэй’’ ӈобт’ ма’’лёда’’. Хусувэхэт ӈуда’ терӈэ ӈамгэхэби мипаӈгу’’. Ӈадьбята тохолкода’’ варемдо’ мэта’’.
Автор: Анна Яптик’ падвы
Сидяӈг: А.Яптик’ тадтавы
Авторы
Няръяна Нгэрм
Темы