Няръяна Ӈэрм
Тохолкурӈаваць
«Няръяна Ӈэрм» газетахана паднанаӈэ сидя яля’ ямбан’ теневабцуна’’ ӈокамдамба тохолкурӈаваць. Сидна’’ табедамбадаӈэ Елена Тимофеевна Пушкарёва тарась. Пыда илна’’ саир’’, вадина’’ нямна паднани’’ поӈгана ёльце юнета яна’’ тер.
Время для чтения ~ 4 минуты
Нюртей яля’ няданда ӈока тирний’’ табекодва’’’ намдаваць. Елена Тимофеевна’ вадавна, мэта вадава’’ етри’ несэйворӈа, тикахана вэвам’ ни мание’’. Ӈопой, лаханаб’’на’’ ӈока луца вадам’ мэ’’ӈава’’. По’ ямбан’ ӈадибермы’’ «Няръяна Ӈэрм», «Лух Авт» юн’ падрона’’ тяхасовна манэ’’мыда. Таняд луца вади ховы, ӈопой падарт’ падвыда. Тикыда мал’ няна’’ ӈадимдейдась. «Гектар», «материнский капитал», «дартс», «номинация», «автобус», тамна ӈани’’. Е’’эмнана’’ табекурӈась:
— 1931 поход луца’’ вади ненэй вадан’ падыбаб’’на’’, хусувэй ненэць’ ханзер’’ хамедамбида, тарем’ падыбасетыда. Толаӈгода ханяӈэхэна тамна нида хамедаӈгу’’: «Паднана ӈамгэ’ нямна лахананакы?» Теда’ ӈоб’ то’’олсавна паднавы ӈэб’’та’’, сава ӈэӈгусь. Тикы’ е’’эмня помнанда’’ ӈопой иӈут’ ха’’амбата’’ тара: луца вадахад товы вадам’ ханзер’’ падыбаӈгура’’. Ӈобкана таслахая падарт’ ма’’лэйда’’. Манзаяхананда’’ ӈоб’ сер’ мал’ мэ’’эйда’’. Вадамбой’ толаӈгода’’ ненэциеда’’ хамедамбаӈгудо’.
Тёняӈы Ненэцие’’ округхад товы «Няръяна вындер»кана манзарана Юлия Талеева Саляӈгардахана тохолковамда тарем’ ваде’’ӈадась:
— Сидя яля’ ямбан’ ӈобт’ тэворӈаваць. Нюртей яля’ падна тоенана’’ серона’’ тасламбиваць. Теда’ вадаханана’’ едэй вада’’ ӈадиберӈа’’. Хуркари’’ лапка’’, пардон’’, ядэлава’’, несэй’’ хабця’’, манзарась’ я’’ нюм’’ ӈэдакы’’. Невхы’’ похо’’на тарця’’ яӈговы’’ ӈэ’’ ним’’. Луца вадавна нюбедо’ теневына’’. Ненэй вадавна ехэрава’’, ханзер’’ падаркана пада сава’’. Юне падыбавана’’ мальӈгана хар’’на’’ ибедорцетыва’’: «Ханзер’’ харе’’ няхана’’ тарця’’ несэй вади тэвраӈгуна’’?». Ханяӈы’’ вада’’ ӈэрм’ тер’’ нина’’ харто’ теневыдо’. Тикы’’ — интернет, такси, компьютер, социальной сеть, эссе, тамна ӈани’’. Луца вадахана ӈэвандо’ сер’ мэцетына’’. Яӈга ненэй вадавна нина’’ вадес’’. Маня’’ хусувэй яля’ юне ма’’ламбадаӈэ манзаява’’ тикаханда ӈока ӈэсеты, луца’’ вада’’ е’’эйӈэ ненэй вади хомба ёльцьва’’ нисеты том’’. Ӈадьбята тарця ӈэ’’ нив’’: ӈопой яхана вунин ӈамдю’’, лахана нядамд хоӈгун, лаханакуртади’, тикы’ пуд намдавыд мер’ падарт’ падаӈгуд, сит хибяхарт пон’ вуни ӈатеӈгу’’. Юн’ падар’’ хусувэй си’’ив яляхана харта ялян’ вуни ӈадимд’’. Етри’ паромбаркаӈгун.
«Лух Авт»‘ тер Зоя Куртямова тарем’ лаханась:
— Неноховавна тодо’’ департамент’’ нюбе хаби’’ вадавна ханзели’’ падыбасетына’’. Мань хар’’ни ини сер’ падаӈгун, няби нями ӈани’ яӈгана’’ вади мэта. Ӈадьбяна’’ маня’’ ӈани’ ӈарка няна’’ табеком’ нёдаб’’на’’ сава. Ӈоб’ то’’олсавна паднаб’’на’’, толаӈгода’’ ненэциена’’ нина’’ поёлтамбаӈгу’’.
Светлана Пантюк компьютерхана падвына’’ газетан’ ӈобт’ ма’’ламбада нява’’ ӈобтикы тохолкурӈась:
— «Искусственный интеллект»‘ нямна няна’’ лаханаць. Сидна’’ тохоламбавы ненэць’ мась: «Тарця’’ едэй мутрам’ мэць тосарка манзарада’’! Ненэй ненэцие’’ ила’ саир’ нямна ӈэда’’ падта’’ми вэнзер’’ серта пиръяда: ненэй паны’ е’’эйӈэ яӈганя ӈэрм’ тер’’ ембдярм’ падтаӈгу, ӈэдалёда’ е’’эйӈэ юнетанам’ ӈадимдеӈгу, пибитана хасава’ е’’эйӈэ хутытанам’ сертаӈгу… Ӈадьбята ӈули’’ тяхасовна хусувэй ӈамгэм’ табедамбида’’!»
«Няръяна Ӈэрм»‘ ӈэвахана мэна Марина Яр тохолковава’’ саву’’ӈадась:
— Ӈока по’’ манзаравана’’ сер’ ханяӈы’’ луца вада’’ е’’эйӈэ ховы вадина’’ мале таня’’. Хар’’на’’ помнана’’ паднаб’’нана’’ мэцетына’’. Ӈокамбой пелядо’ сёбар’’ пирдырми’’ тэнз’’ нямна ӈа’’. Тодо’’ ерво’’ манзарась’ я ӈани’ ӈоб’’ то’’олсаркавна падыбасетына’’. Тарем’ ненэця’’ газетахана толабадидо’ хамедамбидо’. Тад нерня’ Елена Тимофеевна’ ваде’’мы’’ табеку няд’’мадана’’ тараӈгу’’.
Тарем’ сидя сава яля’ сер’ газетана’’ соя’’ма ялям’ сававна мэ’’ӈаваць. Теневабцуна’’ тамна ӈокамдэйнаць.
Автор: Галина Окотэтто’ падвы
Авторы
Няръяна Нгэрм
Темы