Няръяна Ӈэрм
Тохорма’ ёльцьӈэ хая
Ханяӈы’’ яха’’на ӈодя’’ мале вады’’. Сямянхат нерденаӈэ Пяко’’ я’ няд ӈодинда’’ нямна намдаваць. Таняна нумда сяхари’ ибарка ӈэсеты. Нара’ няна сырадо’ мер’ холкаӈга. Ӈадьбята неняӈг’’ ирыхына мараӈгам’ ма’’ламбада’’ варемдо’ мэ’’ӈаць.
Время для чтения ~ 3 минуты
Пяко’’ я’ няд юне падыбада Лариса Айваседо’ вадавна, пыдо’ илесь яханандо’ ӈани похо’’ таслаб’’, ӈодидо’ ёльцяндо’ тось вадёвы’’. Вы’ тер’’, хардахана илена’’ неняӈг’’ иры’ сидя юдимдей яля’ пуд тохорць тебвы’’. Мараӈгам’ вэбараӈгана хомбидо’, ӈадьда хасуй яхана яӈгу, танябта ӈод’’ — тянё. Ненэця’’ тикым’ вадець иринато’ вади тензебтемби’’: «Тюку нара’ хутий хэхэ’’ сарё’ пуд яхана’’ тось. Хэхэ’’ мун’’ сеймда нивы’’ харе’’. Ӈадьбята инда сер’ тодо’’ явна ӈоди моё’’мыда». Тев’ ёльцяӈгана мараӈгадо’ мале пухуця’ ся’’ӈэ ханда. Ламдуйм’ лынзермям’ ма’’ламба пяӈгу’’. Есядамдо’ недво’’ман’ харвана’’ ма’’лавы ӈодидо’ лапкаха’’ мирдапидо’, ханяӈы’’ тэри харто’ ненэцяӈг’’ тэмдарамбидо’.
Надымской район’ няна Еръяха’ тер’’ ӈодито’ хурка ӈэвам’ ӈани’ манэ’’сармэдо’. Мараӈгыдо’, лынзермидо’ ма’’ламбава’ пирӈэ вадёвы’’. Алёна Неркагы мяканда терси’’ нивы’’ тур’’: «Нердена яля’ мяна’’ терӈэ мал’ ядэрӈаваць, ӈопой едкоцяхавм’ тердеваць. Ӈани яляха’’на лынзермярим’, ламдуйрим’ хомбиваць. Мараӈга ӈадьда яхана яӈгусь. Маси’’ лахацие’’ поӈгана, вэбараӈгана танянакы. Тудакохов ӈока».
Тасу’ я’ тер Елена Яр тарем’ лахана: «Яханана’’ ӈодина’’ вадёвдавэй’’. Ӈадяда яхана мерця пу’’лабтавыда. Неро’’ поӈгана ӈоб’ ня’ няръянаӈэ хэвы’’. Ма’’ламбава’ пир’’ ни’’ ӈа’’. Сидя си’’ив яля’ хэ’’мяхад ёльцяндо’ томда».
Я’ мал’ няна Сёяха’ тер Светлана Салиндер’ вадавна, пилю’’ иры’ 20 ялэ’’ пиркана мараӈгыдо’ савумда’’. Лынзермяхавм’ хомбавы’’, тандая’ вадёдана, тамна нюдякоця, сэрако. Небой похона вэба’ иры’ нердена яляха’’на ӈодинзь пявэдо’. Тюку та’ ӈодидо’ мерарка ӈадимда’’.
Салехард’, Си’’ив Харв’ хэвхы выӈгана ӈодя’’ сава паӈохонандо’ мэ’’. Едабэйм’ ӈояк хоӈгун. Ӈокамбой пелядо’ — холкабэй’’. Хасрё’’, малы то’’ вархана толава’ техэ’’.
Тохорта ненэцие’’ е’’эмня нумда тэри сава. Мерця, неняӈг’’, ниберё’’ яӈгу’’.
Тедари’ мараӈга’’ паӈохона малко варера’’ ӈэя.
Автор: Галина Окотэтто’ падвы
Авторы
Няръяна Нгэрм
Темы