Тоса ӈэдалёрта’’

Яра иры’ сидя юдимдей ялэ’’ пиркана Надым’ няю’ ӈэдалаӈгува’’. Сямянхат тарана’’ ненадо’’ ялэ мэтава’’ — ты пэртина’’ сянакова’ яля’’ ӈэӈгу’’. Тодо’’ яхат мядонда’’ тута’’. Маня’’ ӈани’ таня’ ӈэдалёртава’’.

Время для чтения ~ 2 минуты

Хэвы си’’ив яляхана Нядаӈгарад’ няд мэкад юнм’ намдаваць. Пирдырманзь тованда’’ ненэй ненэця’’ вадам’ мэ’’мыць. Ма’’нисям’’: «Ты пэрти’’ сянакова’’ мальӈгана квадрокоптер мэта’’ яӈгобто’ тара’’. Тикы’’ мутрыд тю’’уд ӈэдалёди тадтамбасеты’’. Мунодо’ я’’авласеты’’. Сэбинена’’ мун’’ ӈэдалёда’’ ты ӈапрамби’’. Тарцяхат ненэця’’ тыдо’ тодо’’ я’’амна ханаць пирӈа’’. Ханяӈы’’ ӈэдалёрць мэта’’ тыдо’ саць хэхэда’’, ӈадьбята ехэрана’’ мун’’ ханм’ мэтахана саць вэва’’».

Небо’ ты пэрти’’ сянакова’ яляхана квадрокоптер’’ мале сян ӈэдалёдам’ ӈаправыць. Ӈопой ханм’ мэ’’мы ненэць’ сехэрэнда хэвнямна хэвысь, тамна’ тяха’ пирдырць нивэда пирас’’. Ӈани’ ӈобто’ хацявысь хадюла’’.

Тикы’ хавна ӈани’ ӈопой маяндо’ ӈадимы — ервсяда’’ вэнеко’’. Нядандо’ хунтана ханм’ тэри сянакоӈэ тасламбидо’, ханяцей’ нёраку’’лабидо’. Тэвбато’ ӈадаць пир’’ӈадо’. Е’’эмнандо’ ненэця’’ хусувэй по’ маяндорӈа’’. Квадрокоптерм’ мэтахавм’ тамна хэвня’ тидхалеӈгудо’. Ервсяда’’ вэно ханзеркарт пиде я’’мыдо’.

Тарця вада’’ ӈока хибян’ сававна ха’’амвыдаць. Тедари’ хардандо’ ерв, сянакова’ ялям’ минреванда’’ тикы’ нямна вадам’ нивыць мэс’’. Тарем’ ӈод’’ ӈока хибя’’ ӈахакуд хамеку’’. Пирдырмидо’ яра иры’ 22-23 яляха’’на ӈэӈгу’’.

Автор: Марина Яр’ падвы

Авторы

Няръяна Нгэрм

06:39, 13 февраля 2025

Темы