Няръяна Ӈэрм
Ты пэртя’’ манзарава
Яханана’’ тэхэ’’на’’ мэна’’ ненэцие 2024 по’ ямбан’ ханзер’’ манзаравам’ ты пэрти’’ серо ня’’амбада департамент’ ервота Альберт Чабдаров ваде’’ӈадась. Пыда яна’’ ерв’ тасалковахана лаханась.
Время для чтения ~ 2 минуты
Ӈарка, нюдя яна’’ тер’’ хусувэй по’ помнандо’ пирдырцеты’’, манзаяханандо’ ныхытидо’ хусувэй по’ ваерась нюмдебасетыдо’.
2024 по’ ямбан’ сямянхат ныхы’’мы’’, хусувэй серкана нерня’ мимы’’ — сидя ты пэрти’’ ӈэсы’ тер’’. Тикы’’ СПК «Харп»’ нябимдей бригада, нябиюм’ — СПК «Дружба народов». Ты пэрма’ серкана ныхытидо’ минревы’’ манзаито’ сер’ тасламбавыдо’. Манэ’’сармэдо’ — ханзер’’ ты пэртя’’ по’ ямбан’ тыдо’ маниевы’’, сяӈок суюм’ ты’’ ниць ёльць’ ямбан’ лэтравы’’, сян ты’’ ӈамзам’ ня’’амвы’’, ханзер’’ ветеринарно-профилактической манзаито’ планм’ пандавэдо’.
Тарця тасалковамдо’ похона сидя мэва’ мэцетыдо’. Тюку по’ ты пэртя’’ хаця таӈгавы’’, манзаидо’ тид’’ минревыдо’.
— Небой похона нерняна минда СПК «Харп»хана тыдо’ маниена’’ ненэця’’ ханзоць манзаравы’’. Ӈадьбято’ нито’ нерня тарпы’’. Нябимдейӈэ хэвы’’ — СПК «Дружба народов», няхаромдэй’’ — СПК «Красный Октябрь». Нерня’ тарпавы’’ мядонзэйӈэ еся’ ня’’адмам’ ня’’маӈгу’’, юр’’ ёнаркад юр’’ самляӈг ю’’ ёнарто’ ӈэӈгу. Тикы’ хавна яӈга хусувэй бригадахана ханзер’’ манзаравамдо’ таслаӈгу’’, хибяхарт юрвы ни ӈэӈгу’’. Хусувэй нердена бригада си’’ив ю’’ ёнар’’ есям’ ня’’маӈгу, — тарця’’ вади Альберт Чабдаров хэтась.
СПК’ бригада’’ поӈгана хибя’’ нерде’’?
СПК «Дружба народов» нябимдей ӈэсыхына манзарана’’ ненэця’’ 2024 по’ ямбан’ серодо’ сававна мимы’’. Бригадирто’ — Василий Тайборей. Нябимдей местам’ ханавы’’ — СПК «Харп»‘ нябимдей ӈэсы. Нермбэртядо’ — Максим Канев. Бригада’’ пирдырмахана «Харп» СПК’ нертей бригадахана мэна’’ няхаромдэйӈэ хэвы’’. Ӈэсындо’ серо ня’’амбада — Андрей Ледков’.
Автор: Юлия Талеева’ падвы
Авторы
Няръяна Нгэрм
Темы