Няръяна Ӈэрм
Ты’’ ӈани’ сайнормахана мэвы’’
Мале ӈока ялэ’’ тяхана «Арктическая эстафета Победы» акция миӈась. Победа’ няръяна лабакм’ Чукотской автономной округ’, Якутия’, Таймыр’ нямна ядэладонзь, тикахад Саляӈгардан’ тэврадонзь. Теда’ Победа’ Знамям’ ненадо яхана И.С. Шемановской нюмам’ мэта музейхана лэтамбидо’.
Время для чтения ~ 3 минуты
Ты’’ ниць иры’ сибимдей яляхана редакцияна’’ терӈэ музеян’ хан’’ӈаваць. Россияна’’ ты пэртя’’ серо тасламбада Союз’ тер’’ акцияндо’ мале’’мяхад таняна «Заполярная кавалерия» выставкам’ сертаць. Лохо’ мюня хуркари невхы тадта’’ми, ӈацекы’’ падтавы падта’’ми ӈыдаць. Хусувэй сидяӈгахана сайнорма’ по’’ мальӈгана Карельской фронт’ оленно-транспортной батальонхана нядаӈговы’’ ты пэртя’’ мэць.
Я’ сяр’ ний ты пэрти’’ Ассоциация’ ӈэвахана мэнам’ Сергей Николаевич Харючим’ хонрамбидамзь. Пыда тарця вади няни хэтась:
— Ӈавна Победам’ хусувэй яна’’ тер хахаялтембидась. Ты пэртина’’ тародо’ ӈаркась. 1941 похона Ненэй ненэцие’’ округ’, Архангельской няби Мурманской областьха’, Республика Коми’ няна илена’’ тэсавэй ненэцие’’ е’’эмня табеко’ падар’’ ӈадимясь. Я’’авлада серм’ пирдалеванзь выӈгы илам’ теневани хаӈаць. Пыдо’ ям’ сававна хамэдамбиць, тыто’ хадырць яд таӈга хомбиць, ӈамгэри мал явна сы’’ӈаць пир’’ӈадонзь, мунзипой’’ ӈыхы ян’ тэворӈаць. Тэхэ’’нато’ ӈаврадо’, сайнорць мэта ӈаворидо’, ядаравы’’ нидо’ тэвабиць. Мань ини ядэрабцовна, Ямал’ няд ӈэда’’ ты пэртя’’ поӈганандо’ ӈани’ мэвы’’ ӈэӈгу’’. Пыдо’ сиддо’ ӈобтикы нядаӈгованзь хамэӈэ тосадм’. Тамальӈгана хаӈгавы ты, яӈгуворта ненэць’ ӈока ӈэвысь.
Тикы’ хавна Сергей Николаевич ма’’нисяв’’:
— Саю пидебавы оленно-транспортной батальонхана мэвы’’ поӈгана маня’’ округхадна’’ ӈэда’’ танявыкы’’, нивыкы’’ — тикахат ехэраркава’’. Нядаӈго’’мамдо’ сабе ханяхартана нидонзь вадес’’, юне’’ падарка’’на нидонзь падыбю’’. Париденя’’ тире’’ яна’’ нимня това’ ёльцяӈгана ибедо’ танямна нивы’’ ӈа’’, ямдо’ ӈэдавандо’ няримна няркнавы’’. Теда’ ӈэрм’ тер’’ Победа’ ед’ таром’ ха’’аврамам’ тенева’’. Россия’ ханярина сайнормы’’ ты пэрти’’, ты’’ е’’эмня мемориал, ненадо я сертаби’’. Ямална’’ ӈарка хардахана тарця я ӈадимбата ӈани’ сава ӈэӈгусь. Ӈопой ненэцяри вадам’ мэпта сита хибяхарт ни намдаӈгу’’, мал’’ ӈобнзер’’ вадам’ мэпна’’ ӈамгэхэв харвабта ӈадимда.
Ненадовна хамыдо’ мале сян ненэцясь. Ӈопойдо’ «Ямал-ню’’на’’ я!» Ассоциация’ тер Ирина Геннадьевна Окотэтто. Пыда мась: «Сайнорма’ мальӈгана мяка’’нато’ вэсакори’’, нери’’, ӈацекэри’’ хаёвыць. Пыдо’ халям’ хадабавыць, ембдяро сэдыбавыць, сямян таняна ӈамгэмдо’ тэтнана’’ няхато’ ӈэдарамбвэдонзь. Ӈадимдембада манзаяра’’ ӈули’’ тарана сер’’. Тюкон’ товы’’ кадет’’ то’’олха’’ ӈацекы’’ невхы иле’’мя’ нямна теневаӈгу’’, иринато’ таром’ нидо’ юрыбаӈгу’’. Сидяӈг’’ няби падта’’ма’’ ёльце сава’’. Яна’’ тиӈгывна ӈэда’’ хардаха’’на илена’’ ӈацекы’’ падтаӈгурць варемдо’ мэ’’мы’’.
Выставкам’ манэ’’ман’ харвана’’ марад’ тер’’ маӈгты’’ иры’ юкад вата нябимдей яля’ ӈэсонд’ музеян’ хэсь пирӈадо’.
Автор: Анна Яптик’ падвы Сидяӈг: А. Яптик’ тадтавы’’
Авторы
Няръяна Нгэрм
Темы