Няръяна Ӈэрм
Тыранда ныхы я’’авлы
Хусувэй ныланава’ яляхана Саляӈгардахана тохолкода’’ ӈацекы’’ ӈобт’ ма’’люрӈа’’. Илаӈгана тарана ӈамгэхэ’’ тоходана’’, хуркари юнета ненэцие лаханако ня’’ӈа’’. Тандая’ Ямальской многопрофильной колледжан’, «Ямолод» центран’ ӈопой ненадо мядонда тюӈгавысь.
Время для чтения ~ 4 минуты
Ненэця’’ мюнзи’’ ӈамдыць, нё’ си’ няю’ сылаӈгаць, Россияна’’ сямянхат ва’’лёй’’ тыретани’’ поӈгана мэна нем’ Дарья Салиндерм’ ӈатець. Сиддо’ манэ’’манзь товы няхандо’ ӈули’’ маймбиць. Лахарёмди’ тидхалембадаӈэ юне тэволана Ейко Богданов тарась. Вадетиди’ тид’’ минрейдинзь.
Нюртей еӈгамда ханяд пявэда?
— Мань Ӈыд хардахана соядамзь, тикахана вадыдамзь. Пуна самлянзимдей классахана Нядаӈгардан’ илелъяваць. Несэй хардан’ хэва тоенаркась. Нянани тохолкоди’’ поӈгана ӈани’ ненэй ненэцие’’ тэнзм’ мэта ӈацекы яӈгусь. Нюрте’’э’ нюдяко не нями тыретась. Ӈобаӈгуна телевизоркана я’’авлада сёбар’’ нем’ манэ’’мысь. Ма’’нисяв: «Сита то’’олхаӈэ хэван’ харвадм’». Небями тыретанаха’’ ми’’ӈадась, си’’ми тараванзь ӈэдарась. Баскетбол, волейбол, туризм хорпидамзь. Ӈамгэхэрт ихинани нись пою’’. Таддикахад сидндетимдей классахана Нядаӈгардахана тырета тоходана пэйваць. Тамальӈгана тэравэми тедалахана минрев. 2017 по’ пиркад Новой Уренгойхана иледм’. Си’’ми Алексей Воробьёв тидхалемби, тохоламби.
Тыретава хурка сер’’ ӈэбта?
Ӈамгэри ӈамгэм’ тандая’ пяб’’, нензелта яӈгу. Таминда хибяхарт сямянхат мэбетаӈэ ни ханас’’. Ва’’лёйӈэ хэва’ е’’эмня ӈока ныхым’, нёхом’ ӈэдара тара. Дарья нюдя ӈэдаханда пэдава, харбё ӈэвы. Сямян ӈамгэмда тид’’ сертабавэда, лэкдавахад ехэравы. Сита тохоламбдаханда ӈоб’’ инзелевы. Ӈодь’’ тохо’’махаданда яна’’ тиӈгэвна ӈэда’’ пирдырмаха’’ ханаць пэвы’’. Теда’ Узбекистан, Греция, Сербия, Китай, тамна ӈани’ ё сюртевы. Тад нерняна манэ’’манда яда, хардада тамна ӈока.
— Си’’ми тохоламбдани табековна хусувэй ялями падарт’ падыбасетыдм’. Ханзер’’ тренировками мэ’’ӈав, ӈамгэм’ вэнзер’’, сававна мэсадм’, мал’’ тасламбасетын. Хубтахана ю’’ час’ пиркана залан’ хэсетыдм’. Тикы’ пуд ӈорцетыдм’, ныланасетыдм’. Пуна самляӈг час’ пиркана ӈани’ пэсетыв’’. Ӈобтикы манзаян’ хантархадм’ ӈэсетыдм’. Сборха’’ ма’’люрмана’’ ёльцяӈгана тамна я’’авласеты, няхар’’ яля’ хамекодава’’, ӈопой яля’ ныланаӈгува’’, тамна няхар’’ яляхана ӈани’ хамекодава’’. Сяхаринда тыретаванда’’, сюрберманда’’, ламбитаванда’’ нерцю’’ пыхыдада’’ сомбоковна высылпида’’, тикахана лыда’’ нида ланзяртембаӈгу’’. Пирдырмаха’’ сававна хамэдёсетыдм’. Ӈамгэ ныхыни таня’’ мал’’ мэцетын.
Ӈопой серм’ техэ малханда тэврава’ е’’эмня хурка ӈэсь тара?
Тарця юнета ненэцянд’ инзелева ӈарка таром’ тэвра пир’’ӈа. Ненэся тандая’ тю’’у’ минда’’ вадамда намдабато’ серо’’ӈа. Тикахана сита тотрев’ варемдо’ мэта’’, вэва сехэрым’ ни’’ ханабаӈгу’’. Мэбете’’э не тарем’ табекусь:
— Илаӈгана тэвадана танябта тара. Ӈамгэри ӈэбта ӈод’’, тикэнд е’’эмня яля’ ӈадима нерцю’’ юркортан’, пуня’ ӈэвахад ехэраӈгун. Сертабадамд янамбоковна тид’’ техэ малханда тэвраӈгур. Хэвхананд мэна’’ ненэциед таняӈгу’’, сит нядабаӈгу’’, сава табеко тамбаӈгу’’, тикахана тамна са’’саркаӈгун. Хибяри’ нядаӈгодита яӈгоб’’, сита нерня’ пэртита яӈгоб’’, яланда я’’маӈгуда. Хэвхананд нерняри’ ӈэда ненэця’ мэб’’нанда, сита то’’олха ӈэван’ харваӈгун. Мань си’’ми тидхалембадини’’ сяхаринда сейханани мэ’’.
Автор: Анна Яптик’ падвы
Фото: А.Яптик’ тадтавы
Авторы
Няръяна Нгэрм
Темы