Няръяна Ӈэрм
Ӈудида мэбе’’ӈа’’
Хахаяда яля Салехардахана тодо’’ яхана манзарана’’ организация’’ тер’’ ӈобт’ ма’’лыць. Пыдо’ помнандо’ волейболхана сянакуць.
Время для чтения ~ 2 минуты
Нито’ нерня колледжхана тохолкода’’ няби комбинатхана манзарана’’ пирдырӈаць. Поӈганандо’ мале сян ненэй ненэцям’ манэ’’ӈадамзь, тикахад нюбедо’ хэтыбабто’ Сэротэтто, Окотэтто, Айваседо, Хороля еркаро намдадамзь.
Тю’’уй этажахад сырӈаваць. Пирдырти’’ поӈгана саць ва’’лёйвана сянакодам’ едтедамзь. Пыда ӈобкарт’ мячм’ тэри тарем’ ян’ нись ӈэдара’’. Тад санабата ӈудида поӈга’ тю’’у’ таӈга тэворӈаць. Мячмда минаць ладыбидась, моёпидась, лат’ ед’ хуб’’насавэй ха’’морӈась, няби’’ нида ладыба нидонзь тэвор’’, ӈудахатато’ нялкадарӈась.
Ныланавато’ ёльцькохо’’на някунда хаядамзь, няданда хонаркудамзь. Ӈытарми’’ Саля’ тер Константин Хороля тарем’ лаханась:
— Нябимдей по’ колледжхана и’’мня ӈэдалёрта ӈарка ӈаном’ мэтаӈэ тохолкурӈадм’. Школахана сидндетимдей классахана мэвани мальӈгана волейболм’ саваӈэ манэ’’ӈавась. Район’ тиӈгывна ӈэда’’ пирдырмаха’’ си’’ми ӈобӈгэв’ ханабасеты’’. Тюкон’ тэв’’махадани мэнена серми тамна’ тяха’ минре таславась. Теда’ Саляӈгардахана ӈэда’’ пирдырмаха’’на етри’ мэсетыдм’.
Лахарёми’ хэбицякось. Намдаван’ харванахавами ӈули’’ ӈокась, нями паромась. Мань ӈод’’ пуна хаядамзь, сянаковамдо’ ӈарханда нивась манэс’’. Команданда нябимдей ян’ ха’’амвам’ пуна намдавась.
Ти, тарця мэбета’’, варемдо’ мэта’’ сёбарна’’ теневабна’’ тара’’!
Автор: Анна Яптик’ падвы
Авторы
Няръяна Нгэрм
Темы