Няръяна Ӈэрм
Ӈука неша’’ мянаяш’’
Чуки диԯиӈ кашем’ дю’’ дяԯяхана каԯьтуӈ дяханатуӈ дискат диԯина’’ нешади’’ дет тасԯёта дяԯям’ мэӈаш’’. Чики хома дяԯя чадю’’ нешади’’ тэмс каԯьтуӈ дилмтуӈ, ватамтуӈ дюԯмаӈ тайхана 1994 похона шеԯтамы. Манԯе няхаԯ дю’’ пуӈ чики праздник’ мэштутуӈ. Неԯьшут таньдет ӈанаташтут. Маня’’ Ямалханана шеcв дяԯяӈ дямпан Ӈэԯм’ чеԯ’’ нешади’’ дет тонԯюта’’ дяԯи’’ мэ’эйтоньш’’.
Время для чтения ~ 3 минуты
Округханана таԯьша хома шеԯ «Ямал-100» дет тасԯёта мансдяамна’’, «Народы Арктики» нимита проект’мана минԯейтуӈ. Чуки похона Ӈэԯм’ чеԯ’’ нешади’’ диԯишат каԯтыхина’’ ӈопшеԯы шича дёнаԯкат ва’та мероприятии’’ шеԯтаӈаш’’. Пюԯ дяханана Ӈэԯм’ чеԯ’’ нешади’’ диԯивсум ӈычимчемпёш дяптшаӈ диԯиӈ няхамты дяԯяхат чепьӈаш’’. Неԯьня Пуровский’ районхана диԯина’’ Ӈэԯм’ чеԯ’’ неша’’ поӈкнатуӈ мянаԯяш’’. Шана’комантуӈ, ныптакомантуӈ мэты Таԯкан ӈомаш’’. Ӈука неша’’ мянаԯмантуӈ мэт тоӈаш’’. Таԯкахат диԯина’’ нешади’’ камна Самбуԯкахат, Каԯпюԯкат, Ханымейхат, Каԯясамэхэт, Тазовский’ районхат мэна’’ тадямэӈаш’’. Ӈопшеԯ мат’дю’’ шича спортсмен’’ мянаԯяш’’. Кукиты выӈкат томы’’. Неша’’, капи’’, ӈысма’’ шича дяԯяӈ дямпан мянаԯяш’’.
Неԯьчеэй дяԯяханантоӈ пиԯи нюӈк, нэхэта’’ неша’’ вяԯкуԯоԯяш’’, ха’муԯяш’’, нэхэԯумпиш’’. Дячапётахана таньше мянаԯма неньшаԯ ниӈа, таԯям касамыԯи’’ мянаԯяш’’. Ӈашки’’, ныны’’, ӈаԯка неша’’ тотуӈ группахана мэӈаш’’, шичитуӈ мян няханатуӈ мянаԯяш’’. Вяԯкуԯоԯта’’ хампԯяӈк минутахана няхаԯ мэмаӈ вяԯкуԯоԯьш коноԯьштутоньш. Куки тыньшамта ӈайтамахананта ӈукамана вяԯкӈата, чикимта судьяӈэ мэна тонԯашту.
Няхаԯ’дяӈкня — хампԯяӈк’дяӈкня потуӈ ӈайта каса ӈашки’’ поӈкна вяԯкуԯоԯьш ӈайвахай местам Каԯпюԯкат томы Владимир Агичев канаӈаташ. Пыта ӈукамэмаӈ няԯяӈпаӈким вяԯкӈаташ. Мат’дяӈкня — шеcв’дяӈкня потуӈ ӈайта ныныдю’’ поӈкна ӈайван Таԯкахай командахат мэна Сергей Айваседо ка’амдяш. Ӈаԯка нешади’’ поӈкна Ханымейхат мэна Геннадий Пяк пиԯи ӈукамэмаӈ няԯяӈпаӈк вяԯкӈаш, пыта ӈайвахай местам канаӈаш. Няхаԯ ха’мхана ха’муԯта’’ ӈашки’’ поӈкна нята’’ чеӈ Руслан Пяк ха’амдяш. Пыта ӈайвахай местан ка’амдяш. Ныныдю’’ поӈкна Тимур Агичев нэхэԯяш. Ӈаԯка нешади’’ поӈкна первый’ местам’ Илья Пяк канаӈаш. Нэхэта неша’’ нэхэԯумпёшь пытатуӈ конуԯпиш’’. Таньше мянаԯта’’ ӈашки’’ поӈкна пиԯи нэхэтаӈэ Самуил Казымкин тонԯаӈаш’’. Мат’дяӈкня — шеcв’дяӈкня потуӈ ӈайта мянаԯчи’’ поӈкна ӈайвахай местам’ Роман Пяк канаӈаш. Ӈаԯка нешади’’ поӈкна пиԯи нэхэтаӈэ Тазовский’ районхат томы мячинтамтуӈ Сергей Яр тонԯаӈа’’. Пыта ӈайвахай местам ка’амдяш. Мянаԯьш хитамахататоӈ хомана шана’комы’’, ӈайвахай местам’ канамы’’ тотуӈ диплому’’, медалю’’ няамӈаш’’, веш’’ дет ӈайта сертификат’’.
Автор: Лариса Айваседо патмы
Авторы
Няръяна Нгэрм
Темы