Няръяна Ӈэрм
Вадам’ лэтрамбада’’
Саляӈгардахана ӈацекы тохоламбада’’ ма’’люрмы’’, помнандо’ пирдырмы’’. Мале сян’ яля’ маркана мэвы’’.
Время для чтения ~ 2 минуты
Ямальской многопрофильной колледжхана тохолкода’’ ӈацекы’’ е’’эмня хуркари тохолкова ӈадимдембавы’’. Лакамбой’ тохоламбавы’’ ӈацекыдо’ вадам’ ехэрана’’ ӈэвы’’. Ненэй ненэцие’’, хаби’’, ӈысми’’ хусувэй яля’ мэта вади няндо’ ваде’’мы’’.
Таддикахад вадам’ ханзер’’ лэтра ханзер’’ сава ӈэва’ нямна ибедормы’’. Хар’’на’’ вадавнана’’ ӈэда сё няби стихотворения тохоламба, едэй проект падыба таравам’ хэтвы’’. Вадам’ минрени’’, ӈацекы тохоламбади’’ сообществом’ сертаван’, по’ ямбан’ мале сян диктантм’ падыбаван’, вадам’ минреванда илебей ненэцие ӈахакуд хамадамбаван’ харвавы’’. Пирдырмахана мэвы’’ тарем’ лаханавы’’: «Харто’ яханато’ илена’’ ненэця’’ вадамдо’, иландо’ саирм’ теневаб’’нандо’, ӈацекэхэто’ вадепато’ тара».
Пирдырмадо’ сававна малей’’. Хусувэдо’ варемда мэ’’манда няю’ ненадо ӈуда’ терм’ ня’’ма. Ӈэрм’ тер’’ вади минрена’’ нина’’ ӈули’’ пэдава’’, манзаямдо’ тид’’ минредо’. Няхар’’ нядо’ ӈани яляхана тамна’ тяха’ пирдырта’’. «Учитель родного языка Ямала» пирдырмахана нерня’ ха’’амвыдо’ ти’’: Шурышкарской районхана манзаранаха’ Антон Максаров няби Наталья Вокуева, Приуральской район’ тер Ольга Пандо’. Антипаюта’ няд товы Антонина Яптик няби Сюнай-Саляхана манзарана Любовь Хороля призёрӈэ хаяханзь. «Воспитатель детского сада, реализующий программы на родном языке Ямала» пирдырмахана нерня’ мэвэндо’ нюм’ — Клавдия Филиппова. Пыда Белоярскхана иле. Мужи хардахад ӈэда Лариса Жаринова няби Антипаюта’ тер Екатерина Яр призёрӈэ хаяханзь.
Автор: Анна Яптик’ падвы
Авторы
Няръяна Нгэрм
Темы