Няръяна Ӈэрм
Вадава’’ теневава’’
Округна’’ тодо’’ тэнз’’ ненэцие’’ толаӈгулава’ хардахана диктантм’ падыбиваць. Ненэй ненэця’’, хаби’’, ӈысма’’ мал’’ харто’ вадавнандо’ паднаць. Ной панына’’, мальцина’’ таӈга, имбытадона’’ сераваць. Харе’’ вадам’ лэтрамбава’ яля’ ед’ ма’’лываць.
Время для чтения ~ 3 минуты
Ӈобт’ тэвава, ня манэ’’ма ёльце сава. Маня’’ ӈэрм’ терӈэ ӈопой сер’’ нямна нярканава’’, вадина’’ пилипт’’ ёхован’ тосава’’. Пудана похо’’на ханярина лаханани намдсетыва’’: «Вадамда’’ юрада’’, ехэрада’’, лаханаван’ нида’’ харва’’». Ненэся тэри вадахана ӈа’’и ян’ нива’’ тэваӈгу’’. Хусувэй хибя ӈацекыда вадавнанда пэрпата тикахана тарода таняӈгу. Ненэць’ харта тайку’ нибта ӈа’’ ӈамгэхэрт сава сер’’ ни ӈадимд’’. Диктантм’ падыбава сидна’’ нерня’ минрена то’’олха. Тарем’ вадава’’ тохоламбива’’, ӈамгэхэв невхы няби юрвы вади тензибтембива’’.
Толаӈгулава’ хардахана сидна’’ мале ӈатевыць. Нюбина’’ пад’’махадана’’ мал’’ ӈопой лохо’ мю’ ма’’лыва’’. Ӈэрм’ тер’’ серо тасламбада департамент терхат, тамна ӈани’’ ненэцяӈгат сава вади намдава’’. Сёётэй нехэ’’ инзелева’’. Диктантм’ толабаванда нина’’ нюби намдава’’. Тикахавахад падна пэйна’’. Хусувэхэт падыбадава’’ яӈгасеты. Тюку по’ «Ты пэртя’ яляхана» нюбе’’ӈась, Прокопий Андреевич Явтысый падвэдась. Ӈани’’ по’’ тотрев’ диктантва’’ «Няръяна Ӈэрм» газета ӈэвахана мэна толабидась.
Мале ӈока ненэця’ тось. Поӈганана’’ Яр-Саляхад, Сёяха’ няд товы’’ ӈани’ таняць. Ӈопой не Светлана Манативна Окотэтто ӈули’’ ӈа’’и яхад, Я’ мал’ няӈы Хэхэ’’ Саля’ няд товы. Саляӈгардан’ харта серта сер’ тэвавы’’. Тябихутваӈгаданда диктантан’ тось таславэда. Пыда тарця вади хэтыбись: «Хой’ няна ненэй вадарим’ мэцетыва’’. Паднаваюмгав ет’ тоенаркавы, ӈудацейми, сэвцейни пэдэяд’’. Тарем’ яӈга тоходанма’’ яӈгу’’ ни’’им’’. Мара’’ товэдм’, я ни тер нини манэ’’ӈадм’».
Ӈокханда округна’’ тиӈгэвна самляӈг ю’’ яхана ӈобт’ ма’’люрмы’’. Тохолкода’’ ӈацекы’’, ӈарка ненэця’’ мал’’ теневабцодо’ манэ’’ман’ харвавы’’. Саляӈгардахана самляӈг юкад вата ненэця паднавы. Нюдяко’’ хардаха’’на, марка’’на паднана ӈока ӈэвы.
Автор: Анна Яптик’ падвы
Авторы
Няръяна Нгэрм
Темы