Няръяна Ӈэрм
Вадидо’ лэтрамбада’’ ма’’лёвы’’
Санкт-Петербургхана ненадо сер’’ ӈась. Таняна си’’ив я’ тер’’ ма’’люрӈаць. Я’ сяр’ ниня харе’’ вадидо’ лэтрава’ нямна ӈарка конференциям’ мэ’’ӈаць. Тикадо’ ООН ӈадимдевы ю’’ по’ няю’ минренадо’, нябимдей ӈобт тэвормадо’. Ӈокханда 150 идо’ нярканана’’ ненэця’’ товыць, тет юкад вата яхад ӈэвы’’, ханяӈыдо’ ӈани’’ пареӈода’’ я’ тер’’.
Время для чтения ~ 2 минуты
Нердена яляхана ФАДН’ ӈэвахана мэна Игорь Баринов конференциям’ нэдась. Пыда ма’’нисяв:
— Маня’’ яханана’’ тянё тэнз’’ вади лэтрава — саць ӈарка сер’’. Тикы’ нямна Россия яна’’ серо ня’’амбада’’ — ӈарка няд’’маӈэ тара’’. Вадам’ лэтрава нензел’’ ни ӈа’’, тарем’ ӈод’’ минрена манзаява’’ сэвхана ӈади.Тюку илаӈгана харе’’ вадам’ мэ’’ма, минрева — тоенанаӈэ толы, хусувэй вада’ тэнз — ёхова’ пир’’. Ненэйвана толырто’ тянё ненэця’’ харто’ вадидо’ мэ’’ман’, лэтраван’ харвабцодо’ танябата, тикахана маня’’ хамедамбива’’, тэравы сехэрэва’’ тидпой’ миӈа. Хибяхартамдо’ хэвняна, пу’ няна нива’’ хаеӈгу’’…
Сидя яля’ ямбан’ си’’ив’ я’ тер’’ ӈамгэм’ ваде’’мадо’ ӈани’ тяро’’ӈаць. Хусувэй серкана серо теневана’’ вадам’ тидхалембиць. Тад таслаб’’, хусувэй яхана тянё тэнз’’ вадидо’ лэтрамба саць тэтна’’. Ханяӈы’’ яха’’на помнандо’ мэта вадандо’ тэнз’’ ӈули’’ ӈока ӈэвы’’. Тарем’ Индияхана ненэцяндо’ ӈокадм’ толабаб’’нандо’ хусувэхэна едэй вади’’ тэнз мэти хомби’’. Яханандо’ сидя ёнар’’ вадандо’ тэнз’’ танявы’’. Тикахат 122 толырто’ тянё тэнз’’ ненэцие’’ вадаӈэ толы’’. Сидя ю’’ сидя вадарим’ тохоламби’’. Ӈани’’ нито’ вада’’ — тянё тэнзаӈэ толёда’’ вада’’, харе’’ тэнзаридо’ помнандо’ лахана мэ’’эйдо’. Ваднандо’ янамбовна ӈани’ юрувандаӈэ тасламбидо’. Индонезияхана си’’ив юр’’ вадандо’ тэнз ӈэвы.
Автор: М. Яр’ падвы
Авторы
Няръяна Нгэрм
Темы