Няръяна Ӈэрм
Ва’’лёй не ӈацекы
Нюдяко хардахана илена’’ ӈацекына’’ ёльце пэдава’’. Тад ӈамгэхэв серм’ пябто’ нерня’ ереберӈа’’. Округна’’ пирувна минда’’ пирдырма’’ хавна ӈарка яна’’ пирт’ тэворӈа’’.
Время для чтения ~ 3 минуты
Панаевск’ хардахана тохолкода Виктория Хороля тодо’’ тэнз’’ ӈацекы’’ е’’эмня сертавы конкурсхана пирдырӈась. Нюмда «Экология — дело каждого». Самлянзимдей по’ тоходанана «Экофокус» номинацияхана няхаромдэй ян’ ха’’амвыць. Тадтавы сидяӈгамда «Сохраним природу — сохраним будущее» нюмдевэдась. Ня’’мавы ӈуданда терм’ мале пон’ ӈатевэдась.
Тандая’ лимбя ирыхына тохолкулвандо’ мюмня вада хэвысь: «Ӈамгэхэв не ӈацекэн’ мядонзэйм’ мипаӈгу’’». Паромбари’ мал’’ ӈобт’ ма’’лёвыць. Конкурсм’ ня’’амбада Росприроднадзорхад ненэць’ товысь. Нянанда Ямальской район’ прокурор’, тамна ӈани’’ ерв’’ товыць.
Виктория’ небям’ Екатерина Яптикым’ хонрамбидамзь. Пыда тарем’ ваде’’ӈадась:
— Небой по’ ӈэвы пирдырмахад ненюми «планшет»м’, тамна хуркари ӈуда’ тер ня’’мась. Тикы конкурс теда’ самлянзимдей по’ ӈэвысь. Небо’ ӈопой юр’’ ю’’ ёнар’’ заявкам’ тохо’’ яхат ӈэдаравыць. Мани’ Вика’ ня’ мале сян манзаям’ ӈэдарамбининзь. Ӈоди’’ сидяӈг’’, ты’’ мякы’’ няби нюдякоюм’ ненюни сидяӈг’’. Тикы’ нерня тарцяхат ехэраваць. Нюртей по’ пирдырӈась. Таремгав’ мал’ ӈобкана хуркари’’ пирдырмаха’’на мэсетыва’’. Едэйвана «Дыхание Арктики» конкурсхана мяд’ терсавэй’ мэваць. Сидяӈг, падта’’ма, харе’’ сертавы ӈэдараваць. Нюдякоюм’ ненюми нюдя пэвдей ирыхына сидя грантприм’ ханась. Нюбеди’ «Ярче всех», «Эколята». Нюртейюм’ электричеством сяма’, савадава’ няю’ ӈа. Няби ям’ сяма’ нямна ӈась. Тикахана школахана тохолкода’’, садикан’ ядэрта’’ пирдырӈа’’. Ненюхуюни’ сидябты’ тадтаӈговам’ харвабтади’. Ниди’, нюдяко нямди’, янӈамгэри вэнекомди’ тадтамбасетыхы’. Та’ — мяд’ хэвхы ӈамдэдо’, сыра’ — ты’’, мяд’’, пя’’, вэнеко’’. Ӈули’’ нюдяко хасава нюхуртами тадтаӈгурць мэтам’ мэ’’ман’ харвасетыда.Тюку по’ тамна ӈокарка манзаям’ ӈэдараӈгува’’. Падта’’ма мале сертаӈаханзь. Проектм’ сертаван’ харвава’’ма. Ненюни ня’ ӈули’’ маининзь, тад нерня’ тамна варемда мэта.
Пыдара’’ ӈод’’ ӈацекыта’’ ня’ пирдырмахана ӈани’ мэсь пир’’ӈада’’. Cайтхандо’ тюӈгада’’. Заявкам’ сие ниць иры’ нюртей яля’ ӈэсонд’ ӈэдара пиры’’.
Автор: Анна Яптик’ падвы
Авторы
Няръяна Нгэрм
Темы