обновлено: 05:58, 08 декабря 2023
Няръяна Ӈэрм
Ва’’лёй ныхыдырта
Носиндалава’ ирыхына Словакияхана мэбете’’э’’ ныхыдырта’’ ма’’лёвы’’. Брезно хардахана Европа’ чемпионат ӈэвы. Хуркари ё’’ тер’’ пирдырман’ товы’’. Венгрия, Бразилия, Монголия, Грузия, Сербия яхат ӈэда’’ мал’’ ныхыдо’ хорпавы’’. Маня’’ Россияна’’ тер’’ ӈани’ танямна ӈэдалёрмы’’. Я’ малхад таня’ Дементий Салиндерм’ ӈэдаравы’’.
Время для чтения ~ 2 минуты
Тасу’ я’ тер ӈаха’’на ныхыдырць пэвы’’. Сянако нита ня’ хой’ няна етри’ пирдырцетвы’’. Тамальӈгэхэд мэнена серта нивэда юрыбю’’. Теда’ Сянакова’ яляха’’на ныхыдырӈа, хусувэхэт теневабцода ӈокамдамби. Таддикахад тандая’ Россия’ сямянхат ва’’лёй’’ ныхыдырти’’ понд’ еремы. Тикэнда пуд ненадовна ныхыдырмам’ нерня’ минре пявэда. Нюрте’’э’ харта пыхыдамда тохоламбвэда, хуркари пирдырмаха’’ сырмы. Тедахав’ яӈга сита тидхалембадида танянарха’’.
Дементий сита пир’’ нита поӈгана, саӈгомдо’ мат’’ ю’’ самляӈг’ ӈэсонд’ тэворти’’ поӈгана сямянхат мэбе’’мы. Сита пирдалевы яӈговы. Россияхад ӈэда’’ сёбар’’ ӈобкана нюртей ян’ ха’’амвыд’’. Нябимдей’’ Словакия’ тер’’, няхаромдэй’’ Венгрияхад ядэрта’’.
Тад нерня’ тамна я’’авлада сёбар’’ӈэ хэя, я’’амнада яӈгоя. Вадёданана ӈацекы тохоламбая, яханда ненадо таром’ минрея.
Автор: А. Яптик’ падвы
Фото: Д.Салиндер’ тавы
