обновлено: 05:36, 06 октября 2023
Няръяна Ӈэрм
Ва’’лёй’’ теберӈа’’
Пудана по’’ ӈэрм’ терӈэ поӈганана’’ сёбар’’ ӈадиберӈа’’. Теберць теневана’’ ӈани’ ӈока’’. Илебей ненэциена’’ ӈод’’ ни’’ хаюр’’, е’’эмняндо’ хуркари пирдырми сертаби’’. Тарем’ сёнзито’ мюй высылпи’’, вэва иӈудм’ ни’’ нёда’’.
Время для чтения ~ 2 минуты
Хэвы си’’ив яляхана Ямальской районхы Яр Саля’ хардахана ӈоб’’ ненадо сер’’ ӈась. Таняна тодо яхат товы’’ сёбар’’ ненэця’’ ма’’лыць. Пыдо’ теберти’’ нюртей Открытый чемпионатм’ мэ’’ӈаць. Яр-Саля’, Панаевск’, Салямал’, Сёяха’ няд пирдырманда’’ товыць.
Сянаковадо’ СВО’ няна мэна нито’ е’’эмня минревэдо’. Сайнорти нивандо’ юрыбавандо’, нядабавандо’ няю’ сертавэдо’. Районандо’ тиӈгы хардахат самляӈг ю’’ сянакован’ харвана’’ ненэця’’ товыць. Хусувэдо’ харта е’’эмнянда таславы саӈгомгананда пирдырӈась. Сямянхат нюдя’’ юкад вата сидя, юкад вата няхар’’ потнаць. Ӈоб’’ яля теберо’’махадандо’ тарем’ таславэдо’: сямянхат мэбета’’ Яр-Саля’ тер’’ ӈэвы’’. Пыдо’ нюртей ян’ ха’’мыдаць. Пудандо’ Салямал’ няд товы’’ сёбар’’ еремяць. Няхаромдэйӈэ Панаевск’ няд ядэрмы’’ ӈэвы’’.
Тарця пирдырмахана пудана по’’ пирибтя’’ ӈани’ танясеты’’. Теда’ ӈод’’ не ӈацекы’’ илебей ненэцяӈгат ниць хаюр’’. Ю’’ самляӈг потна пирибти’’ поӈгана Панаевскхад ядэрта Сэротэтто Камилла нюртей ян’ ха’’мыць. Няданда Яр-Саляхад ӈэда Худи Радмила выдаравысь.
Хусувэй нерня’ ха’’амвы сёбар’’ ӈуда’ тер’’ хавна тамна есядамда ня’’мась. Ва’’лёй сёбар’’ ӈэвадо’ Ямал’ тиӈгэвна соӈгу.
М.Яр’ падвы
