Няръяна Ӈэрм
Вэненго’ ӈэсыхына тёр’’ я’’авлыць
Пирдыраць пэвандо’ нерня тыӈаць. Хэхэдана менаруй’’ яркъито’ яӈгусь, хасава’’ варемдо’ мэ’’ӈаць, ӈэдаравыдо’ яӈгувысь. Тикы яханандо’ пон’ ӈэрхавы’’, ва’’нолавадо’ табӈэ хэвысь. Нявотарта’’ ты’’ табм’ тэри илыбидонзь, таб хадӈэ лакри’ хэсеты. Вэн’’ мад’’, сую’’ туро’’, нявотарта ты’’ тоба’’ лаб’’на’’ ӈопой мунӈэ ха’’морӈаць.
Время для чтения ~ 3 минуты
Тыдо’ подеро’’махадандо’ тандая’ сававна ненадо ялямдо’ ядабтамба пядонзь. Хасава’’ ярколаць, ныхыдырӈаць. Не’’ хэвнякуна пирдырта няхато’ сырӈаць. Александра Николаевна Вэненго ӈэсы’ ерв пухуця вадавна, сянаковам’ ӈатевэдонзь. Не’’ поӈгана пыда ӈани’ сянакованда ӈэвы, тэхэ’’на ӈэдалёрманзь ятнавы. Теда’ пирдырта хасава няхата сырмы, ханяӈэхэ’’на тикыда сахарамба ӈоб’’ тёресеты. Пыда тарем’ мась:
— Ӈавна сянакова ялян’ ӈэсыхына турта’’ тамна ӈока’’ ӈэсеты’’. Хусувэй туртам’ чайхана ӈавласетыва’’, тикы’ няю’ Аксаркахад ӈавар’’ тэврамби’’, хибяхартадо’ пихиня’ ни хаёсету’’. Ӈэсыхыхынана’’ хуб’’на’’ я’’авласеты’’. Тюку по’ тянёри ненэця’’ ӈадимя’’, тарем’ ӈод’’ хусувэй товэн’ маймбива’’. Няхана’’ тэворць хуркари тарана юне намдорӈава’’. Тарця ненадо яля саць тарана сер’’.
Хэвхананда нувы меякохоюда ӈаябэй ӈацекэсавэй ӈэбати’ ӈод’’ ӈани’ пирдырӈаханзь. Ныхыдыро’’махаданди’, тикыта помна ярта хобатна нюди’ манзабтаванзь хэсетыхи’. Не’’ е’’эмня ӈобтикы сянакова сертаць. Пыдо’ нидо’ ембпато’ тарась. Хибя нерде няханда паным’, ӈокасьм’ сиребте, тикы нядо’ нерня’ ха’’мы’’. Не’’ ембаторп’’нандо’ саць мере’’мы’’.
Нита хэвнякуна илм’ манэ’’мы хасава сёбар’’ ненэцяӈг’’ сырӈась. Тикы нями ӈобтикы Вэненго ӈэвы. Анатолий Андреевич хахаяда ӈэсыхыд товы, ӈэсы ерв ня’ ӈопой паӈгм’ мэ’’мэхэ’. Тарця нюрцьм’ нивэда ӈэдара’’, сидя сян час ӈэдалёвам’ ӈарка сер’’ӈэ нивэда тасла’’. Сямянхат саваӈэ тэхэ’’на ӈэдалёрмам’ ӈатевы’’. Ялянда сэв’ пэ’ хойм’ сякло’’махад яля’ ямбан’ сярвы мато’’тана хано’’ пэ’ яха’ няю’ нэкалӈадонзь. Юд’ мян’ ӈэдалёда’’ нито’ пуд мюдадарев’ вэрнаць. Лаӈг’ ниня ма’’лё’’мяхадана’’ нито’ пуд ӈопойвана ӈэдалаӈгаць. Мат’’ менаруйм’ мэта ханм’ тидхалемба хасава’’ выдараӈгаць. Ханяӈы’’ сятаня’, маханя’ нэкалпидонзь. Ӈэдалавандо’ нерня ӈобкад тёрӈэ хэсеты: «Вастаzzы! Вастаzzы!» Тикаханадо’ хаби’’ вадавна нямдо’ тыда харева’ няю’ табедамбавэдо’. Не’’ ӈани’ ӈэдалёрӈаць. Хасавахат ниць хаюр’’, ханото’ ни’ ӈамд’’махадандо’ тёрдо’ ты хареба я’’авлыць. Мале торамдавы нява’’ Александра Вэненго няхаромдэй ӈэвысь. Харта ӈод’’ ӈэдалёрти’’ поӈгана Вэненго еркарм’ мэтари’’ нерня’ ха’’амвыдаць. Константин Олегович’ ты’’ ӈули’’ мере’’мыць. Не’’ поӈгад Елена Прокопьевна ва’’лёй ӈэвысь.
Пуна тидаркаӈэ хэ’’мяхаданда пирдырмахана нерня’ ха’’амвы’’ ӈуда’ тер ня’’маць. Тикыдо’ ты’ илаӈганандо’ саць тараӈгу’’. Тарем’ пэ’ тэлхана тянё тэнз’’ ненэцие’’ ед’ таславы хэбидя ялям’ мэ’’ӈадонзь.
Автор: Марина Ярой’ падвы
Авторы
Няръяна Нгэрм
Темы