Вэва иӈудм’ мэтаха’’ еремы

Время для чтения ~ 3 минуты

Тюку илаӈгана ёльце тосакабты, хуркари серт’ еремзь пирӈава’’. Ненадовна теда’ мутра мэць пява’’. Тикы ӈобтикы саць сава ниӈа’’. Илева’ ямбан’ ма’’ламбавы еся ӈопой яляхана тале пиръядо’. Вэва иӈудм’ мэта ненэцяӈг’’ еремым’ лаханако ня’’ӈадамзь. Неновна тарем’ ереберта ӈули’’ ӈока. Хибяхав ехэрана нянда’’ телефонувна лаханабта тосаркада’’, харвабта, талей’’ сидда’’ пянакы’’. Вэвако серт’ еребер’’мамда няни ваде’’ӈась.

— Ӈопой мэва есьни’’ пэнёсяӈгад есьни хацяць ха’’авра’’. Мале ха’’аврамба пяйдонзь. Мань лакри’ нивы ӈэбни хамада’’, есяси’’ хаёдадамзь. Ӈамгэ тарця серт’ еремядм’? Тикы’ нерцюна интернет’ мутрам’ няд’’мяць машина ӈэсь ям’, гаражм’ мирдапидамзь. Таняна номерми падыбахава нивась падыбю’’. Теневана нями харта номерта тикан’ мэсь. Нерде’ пыда нянда лаханавы’’. Нями пыдо’ няндо’ мань номерми ми’’ӈа. Тикахавахад хибяхав няни лахана. Ма’’нив’’: «Торова, машинанд мэлавам’ тэмдаван’ харвадм’. Сян есявна мирдапир?» Сян есявна мипвами ваде’’ӈав. Пуна ӈани’ вахалъй’’: «Тедари’ я’ индадм’ нэкалпади’’ ня’ манзараванзь хэвась пэрӈадм’, иры’ ямбан’ яӈгодадм’. Гаражахав нянани ӈули’’ тара’’нив, ненэся няданд тэмдаӈгув. Пунрёванд е’’эмня нянд самляӈг ю’’ ёнарм’ ӈэдараӈгудм’». Мань ма’’нидам: «Ӈэё, тарси’’ саваню’’ ненэйвана тэмдаван’ харваданю’’». Пуна тамна’ тяха’ вадамда вэтада: «Есям’ ӈэдарамбвани мальӈгана нянд лаханаӈгудм’». Пуна WhatsApp сер’ есьни’’ пэнёсь’ номерм’ хаӈа. Нянда ма’’нидам: «Ӈамгэхэна тара? Телефон’ номер’ сер’ ӈэдара пиръяданю’’». Ма’’нив: «Тарем’ я’’мав, нянани нюмд, сян есям’ ӈэдабтавами ӈадьбата тара. Ихинани мадм: «Ет’ ненэця’ ӈобтикы няни пунрёван’ харванакы». Тамна’’е ма: «Сят нив мание’’. Тайкуна сятаняюна ӈопой кнопка таня, таня’ ӈуда’ таркахана матидед. Есям’ ӈэдабтав, манэт». Манэ’’ӈав, ӈамгэхэрт яӈгу. Тикахад лакри’ сообщение то. Хибяхав СбербанкОнлайн’ мю’ тюван’ харвава, пароль тарава тикахана пады. Ваданда сер’ кнопкам’ нивав’’ матиде’’. Ӈамгэми ӈэса, тад сырӈадам’ телефонни мюй мал’’ маниейда. Тикахавахад талей ӈэвамда хамада’’нивав’’. Минханда лахарёми малев. Мертёвна есьни хэвханани мэвы няхани ӈэдара идеян. Пуна банкан’ лаханадм’. Няни ма’’: «СбербанкОнлайнм’ тедари’ мэць я’’маӈгур. Ӈани’ мэ’’ман’ харвабат банкан’ хэин, сит нядаӈгу’’. Тарем’ таслав, банкхана сертаӈгув.

Теневада’’, вэва иӈудм’ мэта’’ ханярина мэ’’, ханярина сидда’’ ня’’ма пирӈа’’. Ӈадъбята интернет’ мутравна ӈамгэхэвм’ мирдапабата’’, тэмдабабта’’ не’’эльтеӈгода’’ таня пир’’ӈадо’. Есьта’’ ӈэся’ номерм’ хибяхартан’ нёра’’ мипю’’. Лэтрыда’’.

Автор: А.Яптик’ падвы

Авторы

Няръяна Нгэрм

06:53, 22 июля 2024

Темы