Няръяна Ӈэрм
Лаханако ӈадимдемби’’
Панаевскм’ нюбета хардахана «Хаерако сэв» кукольной театр ӈадимясь. Тохолкода’’ ӈацекы’’ ненэй вадавна лаханако’’ ваде’’ӈа’’.
Время для чтения ~ 4 минуты
Мале ӈахакуй’’ похот толаӈгулава’ мяканандо’ «Клуб любителей театра и литературы» таня. Ӈарка ненэцие’’ е’’эмня Оксана Николаевна Мельникова ӈадимдевыдась. Манзараванда ямбан’ хуркари’’ спектакль’’ ӈабтамбавы. Ненэй вадавна ӈэдаха’ сидяханзь: «Юрвы’’ иринана’’» няби «Ӈодякоця’’ мядоӈа’’». Теда’ «Вадаком’» минренаӈэ Алёна Сергеевна Ӈокдэта тара. Нянда пэрмы серм’ ӈудахата ня’’амвы.
Ӈамгэ тарця серм’ пясь тасласар?
— Небой по’ ныланава’ яляхана няни ӈацекы’’ турцеты’’. Сиддо’ «воспитатель»до’ Альбина Ириковна Пырирко тэволасеты. Ӈобӈгуна’ ма’’нидам: «Хусувэхэт няни турӈада’’, ӈамгэхэв серм’ ӈобкана пяб’’на’’ саванё’’. Мюсерта’’ ню’’ е’’эмня ненэй вадавна ӈэда театрм’ сертахава’’. Ӈацекы’’ харе’’ вадамдо’ тенева’’, сянаковам’ харвабта’’. Тикы’ хавна сцена’ ниня мэсь тохода’’. Нянандо’ илека ӈэӈгу». Тикахад ти, «Родные города» нюбета конкурсан’ проектм’ пададамзь, еси’’ няд’’мам’ ня’’мадамзь.
Ӈацекыд лаханакохо’’ ханзер’’ тохоламбид?
— Маня’’ помнана’’ лаханакурцетыва’’. Ӈамгэ’ нямна ӈэвамда, ӈамгэн’ сидна’’ тохоламбавамда тасламбива’’. Хусувэй ӈацекы сармикм’ пихина мэнаӈэ, тэва ямбаӈэ вунида вадес’’. Варкм’ ям’ мядотаӈэ, явакоӈэ ваде’’мам’ ӈани’ ехэрадо’. Я’ иленя ханяна илевам’, ӈорта ӈаврадо’ ваде’’ӈава’’. Ёльце хайнана лахарёӈэ хан’’ӈа. Лабтэйкохона мято’ тахарасянё’’. Ӈамгэ тахараса? Хусувэндо’ харта ваӈгутада, илесь яда таня. Минрена сер’’ми вадам’ лэтрава’ няю’ тидхалы. Сырманзь товэхэ’’ манзетыва’’: «Хибя хор’’ман’ харвада?» Пыдо’ мал’ ӈудидо’ тю’’у’ пэрта’’, манда’’: «Мань!» Лаханарка я’’амнахарт’’ варемдо’ мэцеты’’. Тарем’ вадам’ тенева тарава’ нямна ибедорць пэсетыд’’.
Нюртей лаханакомда’’ сяха’ ӈадимдесара’’?
— Вэба’ ирыхына «Репка» нюбетам’ манэ’’лабтаваць. Мал’ янамбовна тарця ӈаво минре тоходанава’’. Нянана’’ ӈули’’ сава сер’’ то’’олха. Лаханакона’’ ваде’’мана’’ ёльцяӈгана харе’’ вадарим’ мэ’’ӈава’’. Ханяӈэхэ’’на сыртахат, инзеленахат луца’ вадавна вахалта таняб’’, манзетыва’’: «Ненэця’ вадам’ мэс’’».
Сит нядабада’’ нид таня’’?
— Си’’ми нядабадами — Альбина Ириковна Пырирко. Интернатхана манзара. Пыда лаханаком’ ваде’’мандадани тэволасеты. «Хутий»м’ пыда ӈацекыда ӈабтамбидонзь, ӈобкана тохоламбидонзь. Мань ӈобтикы хар’’н ӈацекыни таня’’, матдомдэй класс’ тер’’. Школа’ ня’ ӈобнзер’’ ӈава’’. Интернатхана манзарана’’ нини’’ няни ӈацекыдо’ тэвола’’. Мани’ Альбина Ириковна ня’ ӈабтамбини’. Мел’’ не’’ сянакодва’’ сэдыби’’. Саць тарабта хар’’н сэдорасетыдм’. Мирта’’ хасава’’ мятва’’ миць, падта’’мани сер’ сертадонзь.
Толаӈгулава’ мя’’лихинанда’’ мэсетыда’’?
— Тандая’ интернатан’ ядэрӈаваць. Сямян ӈамгэва’’ таня’ ханаваць. Лабтэйкова’’ няби Хутийм’ ӈадимдеваць. Каникул’’ ӈэва’ сер’ интернатан’ хан’’ӈаваць. Ма’’люрць ядо’ ӈарка. Мякато’ нивы’’ хэвы’’ ма’’лыць. Мат’’ ю’’ пираць: ӈацекы’’, сиддо’ маниенидо’, интернат’ ерв. Мал’ маймбиць, няна’’ ӈока сава вадам’ хэтаць: «Едэй ӈамгэм’ сертавэда’’. Нерняри’ пэрӈара’’». Тикы’ хавна тодо’’ тэнз’’ ненэцие’’ ӈоб’’ няю’ нятва яляхана харад’ терха’’ лаханакуна’’ манэ’’лабтаваць. Ӈокханда си’’ивм’ ӈадимде тасладамзь.
Алёна Сергеевна ма’’нисяв: «Минрена сер’’ми нянани нюрцям’. Нюртей хар’’н падвэми, хибяхартахад нись пере’’ ня’’амбив. Мань вадами мэп’’ни, ӈани’’ нини’’ ӈобтикы си’’ни тотрев’ харваӈгу’’».
Автор: Анна Яптик падвы
Авторы
Няръяна Нгэрм
Темы