обновлено: 04:36, 14 декабря 2023
Няръяна Ӈэрм
Вырэймдо’ манэ’’лабтавы’’
Ӈарка пэвдей иры’ юдимдей яляхана Ямална’’ ненадо яля ӈась. Тикы яля’ ед’ округна’’ тиӈгэвна хуркари сава’’ сер’’ миӈаць. Тарем’ Аксарка хардахана дартсхана сянакуць. Помнандо’ Панаевск’, Белоярск’, Салехард’ тер’’ пирдырӈаць. Ӈокханда сидндет команда тераць.
Время для чтения ~ 3 минуты
Ныланава’ яля’ ӈэбта ӈод’’ сёбар’’ нина’’ хубтахана мер’ ма’’лыць. Ханяӈыдо’ ӈахат ӈэдалыць. Ӈанидо’ хахаядарка’’ хардахат тоць. Пэдёдо’ ӈэдара’’махадандо’, сяй’’махадандо’ таминда пирдырць пэйдаць. Небой ӈобкана сянаковы’’ ненэця’’ няхато’ ёльце маймбиць. Тикахад нито’ сямбирувна сянако пир’’мам’ манэ’’ман’ харвана то’’олхаць.
Яля’ нюртей пеляхана команда’’ сянакуць. Хусувэйдо’ варемда мэ’’ӈась. Тид’’ моётана’’, саць сававна ниня моётана’’ таняць. Сяхаринда ныхына’’ ӈобпирас’’ нисеты’’ ӈа’’. Сямянхат ва’’лёй’’ ти’’: Аксарка’, Панаевск’, Салехард’ тер’’.
Пуна яля’ нябимдей пеляхана ӈопой’’мана пирдырӈаць. Хасава’’ поӈгана Панаевскхад товы Николай Табитуев няхатата ва’’лёясь. Салехард’ тер Анатолий Серасхов нябимдеясь. Няхаромдэй ян’ Панаевск’ тер Вадим Пырирко ха’’мыць. Нехэвахат Салехард’ тер Эльвира Окотэтто са’’ӈась. Белоярск’ тер Ледкова Екатерина ӈобтарем’ я’’авлысь, пыда нябимдеясь. Няхаромдэй ян’ ха’’амвы «Няръяна Ӈэрм» паднана — Анна Яптик.
Дартс малева’ пуд Окотэтто Эльвирам’ лаханако ня’’ӈадамзь. Пыда тарем’ лаханась:
— Мань сидя по’ тяхана дартсхана сянако пэйваць. Тамальӈгана Николай Табитуев’ ня’ ӈопой командан’ еремянинзь. Тенат’ сянако вареми’ мэ’’ӈани’. Хуркари’’ пирдырмаха’’на мэсетыни’, ӈадьбята теневабцони етри’ ӈокворӈа’’. Таддикахад ялэхэ’’ ӈуда тохоламба тара. Тид’’ сянакода, ниня ледрена, вырэй, нерняри’ ӈэда ненэць’ нюртей ӈэсь пир’’ӈада. Нямэхэна Муравленко хардан’ хан’’ӈадамзь. Таняна ӈобтикы ва’’лёй’’ поӈгана мэдамзь. Теда’ мале Салехардахана ӈэванда пирдырмаха’’ хамекудм’.
Ӈани похона яӈор’’ ма’’лёда’’. Харвабта едэй’’ сянакода’’ тута’’. Тюку по’ пирдырмы’’ тамна сахамда’’. Таёльцянд’ хубта, ӈобт’ тэвавандо’ сер’ манэтава’’. Яна’’ тер’’ пирӈадо’, тяхари’ ӈэя’’!
Автор: Анна Яптик’ падвы
Сидяӈг: А.Яптик’ тадтавы
