Няръяна Ӈэрм
Ӈыптаку”, куԓкаԓи” маныӈа”
Куԓкаԓи» ӈычимчеӈаш», куԓкаԓи» ӈамыдю» каԓьтуӈ ӈутаханатуӈ шеԓтаӈаш». Пуровский районхана диԓина» шанат тэмс неша» ӈопкна ныптакуш». Таԓкахана «Ночь искусств» нимита мероприятим мэӈаш». Таньняна дюкат ва’та» площадки» шеԓтаӈаш».
Время для чтения ~ 2 минуты
Ӈуп дёнаԓкат ва’та» неша» ДШИ им.Дунаевского ӈомаш». Таԓкахана диԓина» шанат тэмс неша» мятчеԓсамыӈ таньняӈ тоӈаш». Культурахана мансԓанна» чупей нятакуш», Таԓкаӈчеԓ» ӈокна ныптакомаӈ дёԓьше хомана ӈанатамэт. Чики мероприятим’ шеԓтамээ шанат мастер-класс» ӈычимчеӈаш». Хыниԓмантуӈ мэт томы» нетоӈ, культурахана мансԓанна» куԓкаԓи» ӈамыдю» шеԓтапёш тохоԓымпитоньш».
Ӈашкиуди» майпёӈаш», ӈамышей мастер-классха”на пытатуӈ конуԓпиш». Выӈкна диԓина» нешади» диԓивсум, культурам ӈычимчемпё ПРЦКа ӈука ӈамым шеԓтаӈаш. Маня» нешаӈэ няма заслуженный’ мастер России Сергей Ледков выставкамта «Душа Севера» ӈычимчеманта камна ӈашкиуди» тохоԓымпиш. «Узоры Тарко-Сале» нимита мастер-классхананта шанат ӈашки» куԓкаԓи» хӭйман камуԓта» ӈамыдю» шеԓтапиш». Северный очагхана мансԓанна» ӈупчики ӈука ӈамыдю» ӈычимчеӈаш». Выӈкна диԓина» нешади» диԓидю» ненатумтмам -интерактивный’ календарь пяхат шеԓтамай. Чиким маныденаха» куше понантуӈ неша» диԓештумам вачаӈаш». Куԓка хома дяԓитуӈ тадяӈӭймям кэтӈаш». Чикиӈ камна ӈупчики мастер-класс’ шеԓтаӈаш», нешади» паныдю» ӈычимчеӈаш». Пуровский’ районна патԓу» ӈаԓка мя», библиотекам нимита, ӈупчики выставкам шеԓтаӈаш.
Таньняна мансԓанна» куԓкаԓи» ӈамԓу», шанат тэмс нешай» шана’ку» ӈычимчеӈаш». Кынута», таԓана» ӈупчики тадямэӈаш». Концертхана «Симфония единств» шанат тэмс неша» каԓьтуӈ кынсутуӈ мэӈаш», дянтуӈчеԓ» понантуӈ куше таԓаштомам ӈычимчеӈаш». Таняӈ томы» неша» маньшту», таньше ӈопт ӈома дёԓьше хома. Нинԓи дяхат мэна» нетуӈ диԓивсум, культурам манэшту», понкнатуӈ дёԓимяшошту». Шанат тэмс неша» хома шоньшахана ӈокна диԓинаӈа», чикехана хома ӈӭйты.
Авторы
Няръяна Нгэрм
Темы