Лух Авт
Аган куртаӊ верантты ими
Нижневартовской район Аган куртан уӆмемн ма Анна Васильевна Покачева хоща мойӊа яӊхсам. Ӆув Лидия эвеӆ па хиӆыӆаӆ пиӆн щутщаман уӆ. Ӆув уӆапсайӆ эӆты айкеӆ тус.
– Ма сусн 1954-мет таӆн Сурханӆ район Русскинской куртан сэма питсам. Ма Русскин ханты рут эӆты йиӆам. Аньтем Евдокия Дмитриевна (эви опращнэмӆ Тайбина), ащем Василий Иванович Русскин усӊан. Ӆын хуӆ, вой веӆпасӆасӊан па вуӆы тащ ӆаваӆсаӊан. Муӊ семьяев ар няврэмаӊ ус, ин шимӆ хоят хащас. Павел апщем Русскинской курт пуӊаӆн вут куртан ма вуӆыӆам ӆаваӆман уӆ. Оӆаӊан аньтем антома йис, щаӆта 1995-мет таӆн ащем хув паната шушмас.
Ашкуӆа унты вут куртэмн энамсам. Щаӆта тохӆаӊ хопн Русскинской курта ашкуӆая тусайм. Щита интернатн уӆмемн нулевой классан утаӆтысам, рущ ясаӊ иса ан тайсам, щишн еша ӆаварт ус. Ма туп хуӆам класс етшаптасам, еӆӆы утаӆтыты ант ӆаӊхасайм, щишн аньтемн-ащемн ёхи тусайм. Ма ӆынана нётсам.
Щаӆта уна йисам. Иван Семёнович Покачев хоща мантсам, ӆув Аган ёхан муваӊ ху, щишн 1978-мет таӆн Русскинской курт эӆты Аган курта касаӆсув. Хуӆам няврэм сэма питас, ин Лидия эвем туп хащас.
Еӆӆы Анна Васильевна Аган курт эӆты потартас. Ӆув ясӊаӆ эӆты оша йис, хунты хувн тата ханты Покачеват рут ёх усат. Мет оӆаӊан 1893-мет таӆн там курт эӆты нэпекан ханшса. Щаӆта айӆтыена тый рущат ёхатсат па 1920-мет таӆн утхот верса. Оӆаӊан щи курт Сурханӆ района ӆоӊман ус, 1976-мет таӆн лыпат хойты тыӆащ 24-мет хатӆ вуш эӆты Нижневартовской района маса. Щи порайн тата хуӆ веӆпасӆаты таха, совхоз па па тахет рупитсат. Ин тата няӆсоткем хоят уӆ, щи кутн катсот ханты па хускем ёрн мир. Аган курт пуӊаӆн мув иӆпи питы вой вуты таха рупитӆ, щишн кущайт охн нётӆат хатнэху уӆты па мосты хотат омасты.
Тый касаӆман Анна Васильевна арсыр тахаятан рупитас: совхозн, хуӆ веӆпасӆаты тахайн, певаӆты хотн, катра пормасат ӆаваӆты хотн. 2008-мет таӆн «Центр национальных промыслов и ремёсел» таха пуншам порайн ӆув щий рупитты манас. Тата ӆув куртаӊ мир, няврэмат шоши мир йис верата па арыты, якты утаӆтас. Еӆӆы тата хот ӆаваӆты нэӊа рупитас. Щи юпийн щутщаты манас. Вут куртан вуӆы тащ ӆавӆас.
Анна Васильевна хиӆыӆаӆа хорамаӊ ханты ӆуматсохат ёнтаӆ, товийн тонты хорӆ, щаӆта арсыр хошапат верӆ, нохар юх ӆэрат эӆты ищи хошапат сэвӆ. Ӆув ястас, иса ими верата ӆув аньтеӆ, аӊкаӊкеӆ па щащеӆ эӆты утаӆтыйс. Анна Васильевна эвеӆ ищи арсыр мосты верата утаӆтас, ин Лидия Ивановна Яскевич эвеӆ ищи туса верантты имия уӆ. Щи тумпийн Валентина Бычкова хиӆӊэӊаӆ иса хошӆ па ин аньтеӆ пиӆн шоши мир пормасат верты хотн рупитӆ. А.В. Покачева ӆуӊ порайн унта вонщамотат, толхат, нохар акатты яӊхаӆ.
Ӆўв щиты Аган курт уӆапса эӆты ястас:
– Аган — хорамаӊ па сыстам куртые. Культура хотн рупитты ёх емаӊ хатӆат ӆэщатӆат, щит «Нижневартовской район — щит ма самем», Сус емаӊ хатӆ, щи тумпийн шоши мир «Ворӊа хатӆ», «Вуӆы ӆаваӆты, хуӆ па вой веӆпасӆаты хатӆ» па па емаӊ хатӆат. Ӆуӊ порайн Аган ёхан хуват ай хопаӊ касопса уӆӆыйӆ, еӆӆы мет туса ӆоваӆты хоят округ касопсая Ёмвоша манӆ.
Ям арат таӆ Аган курт кущая Татьяна Семёновна Соколова уӆ, ӆув иса муй верӆ, ӆуӆн куртатн мир яма ат ус. Ар таӆ курт эӆты Ӆаӊки пос вош унты машинайт яӊхты кев юш верса. Туп и нуша — товийн щи кев юш йиӊкия йиӆ. Там куртан оӆаӊан ФАП ус, ин ар таӆ амбулатория хот рупитӆ. Ӆаварт муш пиӆн хатнэху тохӆаӊ хопн Нижневартовск воша туӆа.
Анна Васильевна тыштоман ястас, ям арат таӆ ёхӆы ашкуӆайн «Ханты ясаӊ» урок йира вуса, щишн ӆув ай хиӆыӆаӆ ин рут ясаӊ ант тайӆат. Туп ӆув Люба па Дуся ун хиӆӊэӊӆаӆ хоӆна ашкуӆайн ханты ясаӊ утаӆтасӊан, щишн еша потартты хошӆаӊан.
Ёхи хащам артан Анна Васильевна Покачева ястас, ям арат таӆ ёхӆы «Ханты ясаӊ» газетаевн сурханӆ ханты ясаӊан ханшам потрат ӆуӊатты мосман тайс.
Людмила Шульгина ханшам потар
Авторы
Лух Авт
Темы