Лух Авт
Ай ашкоӆа, вуӆ емаң хатӆаӆ верӆ
Зелёный Яр, Приуральской район хоща ӆуңтасӆ, Пуӆ ёхан сыӆна лайӆ. Йис похал, итта щита ашкоӆа, нявремат хатӆ сыс савиты хат, кас верты, нави тут па хасам маты хатат. Ловатӆна ветъёңкем нэңху ол.
Тампус, щёхар тыӆащ алаңмет хатӆна, Зелёный Яр ашкоӆа емаң хатӆаӆ, хольмаң пеӆа вет таӆӆы йис, хоты нявремат ораңна уваӆ пунсас. Ловатӆна, иволап нилъёң няврем ӆэпаӆ, щита, ашкоӆа ӆыпина холна нявремат хатӆ сыс савиты хат ол, щита па хольмаң пеӆа вет няврем хатӆ сыс савита веритӆа.
1999-мет таӆ щёхар тыӆащ алаңмет хатӆна, 42 няврем щита онттыда питас. Нявремат па амыӆаӆ-ащиӆаӆ ораңна щит мет волаң хатӆ ос. Щи таӆ эваӆт ай классатна онттыды нявремат ант маста питас Охсар похал пеӆа интернатна китта.
Мет алаң онттыда питам нявремат, итта мули щирэӆ хаттэӆ тайӆат па нявремӆаӆ энамӆат, тохлат онттыда етсамеӆ юпина, похлэӆна парта ропытта ёхатсат, итта па ӆув нявремӆаӆ щи ашкоӆайна мантсат.
«Ма тата холмет таӆӆы йис ропытта питмем. Ты ёхатмем итна, там ай похлыйи самамна мохты лоңас. Сэңк омащ тамащ ашкоӆайна ропытта па тамащ похална олда. Ашкоӆа, щит щимащ таха, хата ай нявремат мет алаң хамтепна хоңхлат, кутӆаӆна ямас олта онттыӆат, щита ӆув мет масты призвание мощатӆат, хой-хой вуӆӆы ювман олта ӆытӆ. Ашкоӆа хат путарат па алңищ такан ат лайӆат, холна па ар няврем тата ат онттыяӆ. Нявремат пиӆна ропытты ныңат хонты харты ропатаеӆ эваӆт ант ат метӆат, нявремат па ай ат тайӆат», — Зелёный Яр ашкоӆа коща ның Татьяна Валерьевна Кондратьева лавас.
Муң па нявремат эӆты па ӆувиӆаӆ онттады ныңат эӆты ям ясаң китӆу, ропатайн хонты харты ант ат етсаӆ, нявремат ямас ат онттыӆат, ашкоӆа ат ропытӆ.
Вера Лонгортова хансам потар
Авторы
Лух Авт
Темы