Лух Авт
Ай куртатан ӆупан ӆоваӆты касапсайт верты питӆайт
2021-мет таӆан округеван Пулӊават вошан гребной касапса пуншман ус. Хуӆмет па хутмет ашкуӆайн утаӆтыты няврэмат мет оӆӊа тохи пиӆтасьсат. Вошан верты касапсаятан кассат, Москва вошан нох питыӆысат. Ин симась касты харат ай куртатан верты утсиӆат.
Округ губернатор Дмитрий Артюхов партапса хуват, Горка вош ашкуӆайн утаӆтыты няврэмат ураӊан, ӆупан ӆоваӆты тренажёрат ӆутсайт. Кусяев Горки воша яӊхмаӆ порайн, няврэмат ӆохан хатэмиты утаӆтаты па ӆупан ӆоваӆты касапсайт верты утситы энамты пох Илья Игоревич Русмиленко ӆув пиӆэӆан потрэмийс.
Горка вошан ӆупан ӆоваӆты касапсайт 2023-мет таӆ эӆты манӆат. Симась пормасат китам юпийн, няврэмат яӆап касапсая ӆэсятыты питсат. Илья Игоревич манэма рупатайӆ эӆты каматса ясаӊ верас: «Ма вошан спортивной ашкуӆайн нийӆмет таӆ рупитӆам, няврэмат ӆохан хатэмиты утаӆтаты хоята уӆӆам. Си тумпийн, эвет па похат пиӆан ӆупан ӆоваӆты касапсаята пиӆтасьсам. Ӆупан ӆоваӆты, байдарка па каноэ касапса округ федерацияя вохсайм. Тохи ӆоӊмем юпийн, Ӆорвош районан Горка вошан симась таха пуншса. Тренажёран, экран хуват виртуальной хопан ӆоваӆман, ӆэсятыты рахаӆ. Ӆуӊ пора ӆаваӆты ант мосаӆ. Таӆ сыс ситы ӆэсятыты верытӆат. Онлайн сирн касапсаятан касты. Хон мув си вер сирн касты па рупитты хоятат мастер-классат маӆат.
Муӊ гребля-индор хон мув ашкуӆайт кутан манты проекта няврэмат пиӆан пиӆтасьсув. Сита ветъяӊ пеӆа йи ашкуӆа хус регион эӆты ӆоӊаӆман уӆ. Муӊ округ хуват кимет ашкуӆа. Округ куртат кутан оӆаӊмет ашкуӆа, хой симась касапсаятан касты питаӆ».
Яӆпа пуншты симась касты верат «Развитие физической культуры и спорта» хон мув программаята ӆоӊаӆман уӆӆат.
Альбина Тырлина ханшам потар
Авторы
Лух Авт
Темы