Лух Авт
Ай тэӆна верта хасӆ
Муӊ тус ясаӊ ныӊӆу тун каратӆат, щищкан па ной эваӆт йинтасӆат, сох эваӆт верӆат. Ӆув ропатайӆаӆ пеӆа вантман сам аматӆ. Маина Серасхова ай тэӆна верта хасӆ, ӆув верты ропатайӆаӆ пеӆа ки вантта, лавта рахал — сарнеӊ яс тайты ныӊ. Итта ӆув Охсар похална ол, верта хасапсэӆ ропатайи тайӆаӆӆы.
Маина Ягиевна тамиты лаваӆ: «Ма энмам мувам Пуӆъёхан овс мув, щита энамсам. Ащем Яги Александрович Серасхов, амэм па Татьяна Михайловна, олман хуват тащ савиман па хуӆ веӆман осӊан, ӆын эваӆтыӆан вантман муӊ тамащ ищки мувна олта онттысу.
Ма «Мастер декоративно-прикладного искусства» нэм тайӆам. Мала эваӆт аса йинтта веритӆам, каӆаӊ сох ат ол, ной ки ной, щищкан. Йинтаста ай тэӆна питсу, амэв мала верӆ, муӊ па щит пеӆа вантман самӆу ӆытӆат. Ай итам иты ищи тун каратӆам, йинтасӆам. Яйӆам па ащеӆ пеӆа вантман и охал, и нымаӆ, и сатап верта хасӆат. Йиӆап энамты нявремат ораӊна итта щит сэӊк щёкат. Муӊ орӊиӆуна щит щёкат ропата ант ол, муӊ щиты онӆаман оллу.
Муӊ округу хуват мастерат ораӊна каман сот уйтантопсайт верӆайт, щи порайна мин итам пиӆна верам пормасӆаман пиӆна ярмаркайна ёхтыӆыӆман, тынэсӆаман. Щиты актащиман йиӆап лохсат верта рахал, йиӆап ропатайт вантта, наӊ верам пормасӆан эттада. Аӆ порайна ма пормасӆам вантапсайтна китыӆыӆӆам».
Муӊ орӊиӆуна, ханты маса — щит олапсы. Йис тэӆна этам щират-пищат верта хасты ныӊат савиман тайӆаӆӆаӆ па ищиты алӊищ ат туӆаӆӆ. Муӊ мувувна хонты харты ханты мур ӆув олапсэӆ ант ат ярэмаӆэӆ, нявремӆаӆ ат онттаӆат. Тумтак яс, тумтак кур!
Вера Лонгортова хансам потар
Авторы
Лух Авт
Темы