Лух Авт
Айкеӆат ханшиӆыӆув, ханты ясӊев шавиӆыӆув
Хащам таӆан верытмев кеман округ ӆоватан тыйиӆыйм верат эӆты айкеӆат ханшиӆысув. Ай куртатан па ун вошатан уӆам воӆаӊ верат эӆты потрэв тувиӆысув.
Хащам таӆан ар потар няврэм, хоттэӆ хоятат эӆты ханшиӆысув. Таӆаӊ тэӆан ант верытсэв кашӊ хоттэӆ потра понты. Муӊ уятӆэв, па нын ищи уйтӆаты — щимащ хоятат муӊ кутэван уӆӆат. Ханты мир уӆапса, ясаӊ туӆат. Ӆув онтасэӆан па мир хоятат аршак уятты питсат, муй ям верат ханты хоятат тайӆат. Муй хорпи каркамеӆан па тусэӆан постам верӆаӆ паты унты туӆӆаӆ.
Касӆыман яӊхты па хуӆ веӆпасӆаты хоятӆув онтасан муӊ ханты мир уӆапсаев хонна ӆыӆаӊ. Щишан там мосмаӊа тайты хоятӆув ищи ант ёрэмисӆув. Ӆув уӆапсаеӆ тумпийн хонна ханшиӆысув, муй хорпи нётопсайт округ ӆоватан верман уӆӆат. Ӆуӆан, кашӊ хоят ат уйтас, муй хорпи нётопса утхот эӆты вохты мосаӆ, муй ураӊан там муй па тум пормас мийӆыӆа. Щи тумпийн, касӆыман яӊхты хоятӆув няврэмат ашкуӆа юпийн ун тахаята утаӆтыты мантэӆан, ищи нётопсайн маӆайт.
Энамты няврэмат па ӆув аӊкиӆаӆ-ащиӆаӆ ураӊан потар верыӆысув, хоӆта рахаӆ ашкуӆа юпийн утаӆтыты манты. Ванты, щимащ тахаятан няврэмат утаӆтаӆайт, ӆуӆан, еӆӆы хатӆатан ӆув верытсат ханты мирэӆ кутан рупитты па ун онтас туты. Утаӆтытэӆ тумпийн рахаӆ грант ох шитты, щи веран мосаӆ турамсот касапсаята пиӆтащиты, юрэӆ па щёмеӆ артаӆыты. Тухаӆ няврэмат эӆты потрат ищи верыӆысув. Муӊева ищи умащ уйтты, муй хорпи верат энамты няврэмат кутан тыйиӆыӆат, хоты сахат ӆув уӆлиӆыӆат.
Хуӆмет таӆа йис, хоты кашӊ хоятэв рутаӆ, яйӆ, апщеӆ, ащеӆ, аспохаӆ, ӆэхуйӆ ляль харан уӆ. Шеӊк щаль, тухаӆӆув щи ляльн антома йисат. Аратаӆан потар верыӆысув щита уӆты па уӆам хоятат эӆты, муй хорпи нётопсайт лялясты мохиӆув па ӆув хоттэӆ хоятӆаӆ ураӊан уӆӆат. Тампуш Ямал муван герой Таӆа постаса, хон мув ӆоватан Хон мувев сайӆаты хоятӆува юкантса. Щи веран ар потар там питам ляль харан уӆты па Ун Ляльн уӆам хоятӆув эӆты ханшты питӆув. Ляль порайн рупитам хоятӆув па нумаӆмиӆӆув. Хой айкеӆ тайӆ, ханшаты.
Хольмаӊ пеӆа няӆ таӆа йис, хоты кашӊ ӆапат монщат, йис потрат, ӆуӊтарат ай няврэмат па ун хоятат кеша понӆув. Щи рупатаев ищиты еӆӆы туты питӆэв, Ванты, тамащ потрат онтасан ханты ясаӊ мет ямас шаващаӆ. Щита тухаӆ хоятан хонна ант хуӆӆыйм ясӊат уӆӆат, муй щиран муӊ овращӆув па щащиӆув потартысат.
Газетая потрат поныӆытэв тумпийн, муӊ хонна «ВКонтакте» па «Одноклассники» хоща уӆӆув. Щий потрат поныӆытэван муӊ ищи артаӆаӆув, муй хорпи потрат хоятата мосӆат, муй отат пеӆа па кашӆы-пушӆэт. Таӆ сыс щи соцсетятна хоятэв ищи ара йис.
Кашӊ хоятэма вутщиӆам пумащипа ясаӊ ястаты! Тамиты ияха юрэв па щёмев понман муӊ, кашӊ хоят, ун вер верӆув. Ясӊев шавиӆэв, уӆапса щирэв еӆӆы туӆэв. Там яӆпа питам таӆан тумтака уӆаты, аӆ мушитаты. Кашӊ хоттэӆан туп амат, няврэмат па хиӆэт нях ат щащаӆ. Ойӊа-пищаӊа, йисаӊа-нуптаӊа!
Аллина Яковлева ханшам потар