Лух Авт
Аӊки-ащи рут ясаӊ
Муӊ Россия мувеван хоятат архорпи рут ясаӊан потарӆат, сот ветъяӊ моӆтас кем арсыр аӊки-ащи рахаӆ хуӆты. Кашӊ мур уӆапсайӆ па ясӊаӆ арсыр. Щишан шеӊк ям, хун муӊ па мур эӆты па мув леп ясаӊ эӆты ӆуӊатӆув, вантӆув па ӆырапӆув. Муӊ иса рут ясӊев шавиман тайӆэв па самӆув хошиӆат хун энамты няврэмӆув ӆув ясӊеӆ ант уйтӆэӆ. Кашӊ мур ӆытӆа, ӆув рут ясӊаӆ еӆӆы хоӆна хув ат щащаӆ па най иты самӆув ат хошмаӆаӆӆы.
Туняӆ Россия воӆаӊ ун кущаев кат яӆап емаӊ хатаӆӊан постас. Оӆаӊмет хатаӆ, щит — шимаӆ ай мурат емаӊ хатаӆ, кимет — ай мурат рут ясӊеӆ хатаӆ. Щимащ законат муӊев шеӊк мосӆат. Кашӊ хоят щи постам законат хуват верытаӆ моӆты верты, моса яӆап ӆуӊатты нэпек ханшты, моса кино верты ӆув мураӆ эӆты па па верат. Хун муӊ и юр, и номас яха понӆув — туп щи порана муӊ наӊк юх иты таксарат.
Курк тыӆащ хольмаӊ пеӆа оӆаӊмет хатаӆан рут ясаӊ емаӊ хатаӆ постаӆув. Яӆап таӆ тыӆащан Москва вошан арсыр мув эӆты па арсыр рут ясаӊан потарты хоятат яха уйтантысат. Утаӆтыты лотан Марий Эл, Чувашия, Дагестан, Ямал муват эӆты хоятат уйтантысат. Кат нопсаӊ па самаӊ хоятӊан — щит Самира па Эвелина муӊ кешаев ӆэщатсаӊан па потарсаӊан, муй рахаӆ па мосаӆ рут ясӊа ханшты. Ин ванта интернет хуват рахаӆ камн ӆуӊатты нэпекат ханшты па ӆэщатты.
Щита тамащ верат моштасув: хоты хор нёхты хора верты, хоты рахаӆ потар сыйна понты, хота рахаӆ хорат каншты, хоты хорат щуратты па па арсыр отата утаӆтысаюв. Щи верат иса щи кеша ханшам программа хуват оша пайтты рахаӆ. Хуӆам хатаӆ щита утаӆтасаюв па кашӊ хоят ӆув ясӊаӆан, ӆуӊатты нэпек ӆэщатас. Самира па Эвелина щикуш па рут ясаӊан потарӆаӊан, туп ӆын шеӊк ӆытӆайӊан, ӆуӆан муӊ рут ясаӊӆуван арсыр ӆуӊатты нэпек ат этаӆ. Кашӊ ёхтам хоят шеӊк ӆытаӆ, ӆув ясӊаӆ хоӆна хув ат щащаӆ, энамты няврэмӆув ат потарӆат, ӆуӊатӆат, монщ мутра хуват ӆуӊатӆат па вантӆат. И хоят ищи верытаӆ ар вер рут ясӊаӆ кеша верты. Роман Прокопьевич Ругин шеӊк мосты ясӊат щит эӆты ханшас. Там ханшам ӆуӊтараӆ кашӊ рут ясӊа ӆэщаӆаӆ. Щишан рут ясаӊӆув ат сыяӊ па сыстам ёхан йиӊк иты овӆат.
Любовь Возелова ханшам потар
Авторы
Лух Авт
Темы