Лух Авт
Аӊкия юкантам воӆаӊ мойӆапса
Там ванан ма Эльвира Егоровна Сивкова (Лонгортова) пиӆан уйтантысам. Ӆув Щаня мув Овоӆаӊ куртаӊ нэ, Мужи вошан уӆ па школа искусств хотан няврэмат ольпаӊ хор ханшты утаӆтаӆ. Там товийн ӆув «Мать защитника Отечества» воӆаӊ меваӆ пос мойӆапсайн юкантса.
Эльвира Егоровна ар няврэмаӊ хоттэӆан 1973-мет таӆан уйт ӆор тыӆащ оӆаӊмет хатаӆан сэма питас. Ун яйӆ па опиӆаӆ кутан ӆув мет ай. Ӆув юпеӆан хоӆна кат пох апщи. Ащеӆ Егор Семёнович Лонгортов уӆмаӆ хуват хуӆ-вой веӆпасӆаты хоята ус. Ӆуӊ пораятан хоттэӆ мохиӆаӆ пиӆан Ун Асан, Ӆаӊкивош ноптаӆты панан веӆпасӆыйс. Аӊкеӆ — Варвара Николаевна, эви опращаӆ Куртямова, аӆаӊ антома йис. Егор Семёнович яртъяӊ няврэм пошхиеӆаӆ утща энмаӆман, ар таӆ звеньевой бригадира ус па планаӆ тэкаптаман вещкат рупитас. Хоят пеӆа нэмоӆты порайн атом ясаӊ ант ястыӆыйс, атом сэман ант аӊкармиӆыйс.
Ай эвиеӆ, Овкуртаӊ ашкуӆа-интернатан утаӆтыты етшамаӆ юпийн Пулӊават вошан училище культуры па искусств хота, хор ханшты хоят пеӆа утаӆтыты манас. Юхат, Топаӆ вош Д.И. Менделеев нэмпи социально-педагогической академияйн высшой образование диплом нэпек ёша пайтас.
Няврэмат хорамаӊ ольпаӊ хорат ханштыя утаӆтаман хус моӆтаскем таӆ рупитаӆ. Рупатайӆ шеӊк самаӊа тайӆаӆӆы. Хор ханшты тумпийн тонты, щашкан, сак, нуй, торн пиӆан рупитты хошаӆ. Емаӊ хатӆат манты порайн, уйтантопсаятан мастер-классат туӆ. Ӆув ёшаӆан верам хорамат арсыр вантопсаятан вантты рахаӆ. Утаӆтам няврэмӆаӆ ханшам рупатайт камн сыр касапсаятан оӆаӊ местаята этӆыӆат.
Эльвира Егоровна хуӆам няврэм ¬– Роман, Сергей похӊан па Варвара эви тайӆ. Няврэмӆаӆ уна йисат. Хоӆыена утаӆтысат па рупитӆат. Сергей — ай похаӆ, рупата пеӆа утаӆтымаӆ юпийн, армияя яӊхас, ёхи ёхтас. Ин Мужи вошан уӆ па рупитаӆ. Варвара, аӊкеӆ иты, ольпаӊ хорат ханшты хошаӆ, нарасъюхан нарасӆыйӆ па ай няврэмат нарасӆыты утаӆтаӆ. Ху сая манас па, па хон муван уӆман, социальной сеть ВКонтакте «Нови тохты» группа верас, хота ханты мир ёх яха актас па ханты ясаӊ утаӆтаӆ. Номпсаӆан хоӆна ар хоятата мосты вер ӆэщатты утщийӆ. Ун похиеӆ ай тэӆан тохӆаӊ хоп тутӆыман рупитты ӆаӊхаса. Ашкуӆа етшамаӆ юпийн номпсан тайм вераӆ пеӆа утаӆтыты манас. Сызрань вошан военной авиационной училище лётчиков утаӆтыты етшаптамаӆ юпийн, Воронежской военной академияйн утаӆтыйс. Ин ӆув гвардии капитан ӆаӊкар посаӊ нэм тайман Кореновской районан вертолётной полк хоща служитаӆ. Роман там йис пора яӆап тохӆаӊ хопан хон мувев сайӆаман рупитаӆ. Щаня муван имеӆ похаӆ пиӆан ӆувеӆ ёхи ӆаваӆӆаӊан.
«Кашӊ аӊки ӆув няврэмаӆ эӆты самаӆ хошийӆ. Ӆыпеман манэм щикуш ям, похем щи ӆоват карты шуп машина тутӆыман рупитаӆ. Туп хув тахайн уӆман, номпсэм тохеӆ пеӆа керӆаӆ. Кум шиттаӆан, потарты хошап хуват потрэмаӆман. Менем па хиӆэм хоща Овкурта яӊхиӆыӆам. Хиӆы похием апаӆматэман, матты ки похем ванан», — Эльвира Егоровна ястас.
Роман похаӆ рупатайӆ вещкат верман, кущайӆаӆан мосман тайӆа, арсыр ишакты нэпекатан юкантса. Там товийн, ӆув рупатайӆ уӆты мув сыӆ эӆты аӊкеӆ «Мать защитника Отечества» меваӆ посан мойӆаптаса.
Там нэӊиев пиӆан уйтантытыйн, иса умащ потрэматы. Щикем щи амат туты, самаӊ хоят. Уӆтыйн ястаӆа: «Хоят ӆыпи сохаӆ, верты верӆаӆ хуват ныӆа». Эльвира Егоровна ям номасан ханшам, ӆыпи хошам туты рупатайӆаӆ хуват, самаӊ няврэмӆаӆ энмаӆмаӆ юпийн, еӆэм ант тайман, сыстам веншан еӆӆы пеӆа ат вантаӆ.
Муӊ па ӆувеӆа мойӆапса ясаӊ китӆув. Эльвира Егоровна тумтака уӆа. Наӊ тус ёшӆанан верты, хоӆна тэӆые хорам рупата ат тыйӆ. Рут хоятӆан, няврэмииӆан иса ванан ат уӆӆат, Тураман ат шавиӆайты.
Зоя Куртямова ханшам потар
Авторы
Лух Авт
Темы