Лух Авт
Актащапса маныӆыйс, верытам мохем мойӆапса шитыӆыйс
Хащам ӆапатан «Российский Север» форуман энамты няврэмат Новый Уренгой вошан уйтантысат. Хольмаӊ моӆтас мир рут няӆъяӊ пеӆа вет субъект эӆты ёхтыӆыйс. Хащам таӆатан ханты мирэв эӆты щий артан айӆат мохиӆув пиӆтащиӆат, мойӆапсайт ёша пайтыӆыӆат.
Там уйтантопсайн нэмат ястасайт, хой Росмолодежь.Гранты щиран ох шитас. Аратаӆан ӆапат проект нох питас. Ойӊ хоятӆув Ямал, Бурятия, Хакасия, Якутия, Хабаровской край па Коми Республика эӆты уӆӆат. Ямал мув эӆты Анна Сотруева па Владимир Сэротэтто нох питсаӊан.
Вӆадимир Сэротэтто «Овс муваӊ нёӆ эсаӆты ху» нэмпи проект пиӆан нох питас. Ӆув нумасаӆ юхӆат на нёӆат ӆутты. Щи веран Тюмень вошан уӆты студентат пиӆан касапсайт верыӆыты.
Ханты мирэв эӆты Анна Сотруева нох питас. «Ямал ар мираӊ хоттэӆ» нэмпи проектаӆ мира этаӆтас. Щи веран хуӆамсот ветъяӊ пеӆа нийӆ щёрсаӊ сертификат ёша пайтас. Папуш Россия Президент партам щиран хон мувев мират ияха уӆты Таӆа постаман уӆ. Щи веран там проект шеӊк тохи рахаӆ.
Анна Николаевна каматса ясаӊ ястас, хоты сахат там постам вераӆ рупитты питаӆ: «Там проект верты порайн муӊ нумасӆув па хон муват, па мув суӊат эӆты ёхтам хоятата потарты па альты хоты Ямал муван Овс мув шимӆаӊ мир хоятат уӆӆат. Ӆув пиӆӆаӆан мастер-классат верты питӆув: сак эӆты каратты, вой пун эӆты пормасат верты. Потарты па альты муй хорпи ханшет тайӆув. Щи веран мосты пормасат ин мойӆам охӆуван иса ӆутты питӆув. Там проект манты сысаӆ, няврэмат утаӆтыты порайн верӆэв. Ашкуӆайн па колледжан утаӆтыты няврэмат, ӆув хоттэӆ хоятӆаӆ ураӊан шоши мир уӆапса музейт мохты этаӆтаӆув. Канащ пухӆа, И.С. Шемановской вантопса хота па Саран курта тутӆыӆӆув. Муӊ верты рупатаев пиӆан вош тыйм Хатаӆан, турамсот ун фестивалят манты порайн, няврэмат сайӆаты Хатаӆан ищи пиӆтащӆув. Нумастэман, там постам рупатаев паты унты туӆэв па кентат манаӆ».
Ин аратаӆ айӆат ёх ӆув мув суӊӆаӆа ёхӆы мантсат. Там уйтантопса эӆты номас вусат, муй хорпи проектат пиӆан папуш этты рахаӆ. Муӊ ханты няврэмӆув ищи ат ӆэщатыӆат. Номасан тайты ям верӆаӆ нэпека ат понӆаӆӆаӆ, ханшӆаӆӆаӆ. Верты ӆаӊхаты верӆаӆ ат тыйӆат, миран ат вантӆайт. Щи веран ханты мира ун онтас па питаӆ.
Аллина Тоярова ханшам потар
Авторы
Лух Авт
Темы