Лух Авт
Ӆапанты муй ӆапата?
Кашӊ ханты хоятэв ӆув потарты щираӆ ванан тайӆаӆӆы. Еӆаншак уӆты хантыӆаӆ па щиран ки потарӆат, мохты нумасаӆ: «Щит муй лэӊкет? Потарты век ант хошӆат». Щит, ӆув энмам муваӆ, ванан уӆам хоятӆаӆ эӆты ӆойӆ.
Ма, энамты нэӊа уӆмеман, ищи щиты нумассам. Хун Пулӊавта рупитты ёхатсам, «Щёпр Авт» студияйн Леонтий Антонович Тарагупта пиӆан рупитты питсам. Радио хуват этты потрат ӆэщатсув. Аӆ потрат тумпийн, монщат, арат, йис потрат эсӆысув.
Щи тумпийн партыӆысӆы ай потрат ханштыя. Хота 7-12 предложений эӆты таӆаӊ хор ат ныса, таӆаӊ уӆапса. Мет оӆаӊан ӆавартшак ус щимащ ай потрыет ханштыя. Юхат утаӆсам па, щикем ям. Каматса ясаӊан ханшман, яна, матты ки, таӆаӊ мир кащаӆасан!
Йи порайн ӆапанты эӆты ханшсам. Ин воӆаӊ ант нумӆэм, муй щи потрэман ус. Таӊха, хоты ӆуӊан ӆув муӊ ноптаӆты Хишпанэван пурӆыӆысат. Хорамеӆ аӆ па ищи тый тэваӆсэм, хойн вантса? Мосаӊ па, сух ӆапанты эӆты ханшиӆысам?
Аспохем икийн ӆуӊатты питаман, ястаӆ: «Муя па ӆапанты? Ӆапата. Щиты мосаӆ ханшты!» «Антом, ма щиты ант ханшӆэм! Муӊ хощаев — ӆапанты! Муӊ Кунават мувеван иса щиты потартыӆа. Ӆапата — щит муй картсар?»
Катра порайн ун хоятӆув эӆты моӆты ки инщмисув, ӆув муӊиӆува потартысат: «Уна йиӆан, моштаӆэн!» Яна щи, хун щи вер эӆты иса нумасӆан, тыеӆ-тохеӆ номпсэн поныӆыӆэн. Моӆтыя ошен-щащен йиӆ. Ант ки нумасӆан, щиты олы-молыя хащӆан.
Щи веран, кашӊ хоят уна пелка йитаӆан, мув ӆоватаӆан вантты питӆаӆӆы. Ант ермаӆ туп ӆув рутаӆ потарты щира. Ӆув пуӊӆаӆан уӆты ханты мирыеӆ ясаӊ иса моштаӆӆы, уйтӆаӆӆы. Щишан ин, куш Кев леп ханты, Касам ханты, Хаӆэват Пелак ханты пиӆан ма потрапсаеман потарӆам, ӆув па ӆув потрапсаеӆан потарӆат — иса ошаӊ.
Щишан, нын ищи, аратаӆ хантыӆув ясаӊ ванан таяӆан. Вещката, щащаӊа уӆаты. Тумтак ёшан, тамтак куран!
Аллина Тоярова ханшам потар
Авторы
Лух Авт
Темы