Лух Авт
Ӆапатъёӊ каман рот пормас артса
Ямал мув губернатор Дмитрий Артюхов СВО хоща лялесты ях пиӆна уйтантыйс, ловатӆна ертъяӊ подразделение. Щита ӆув ляль ораӊна машинайтна па «Кречет» нэмпи дронатна масайт. Ӆув кутӆаӆна ӆапатъёӊ каман рот пормас артса.
Щит ниӆ «Садко» нэмпи машина па щи арат прицеп, нильхощъёӊ мотоцикл, хут квадроцикл, йи УАЗ, 140 камикадзе-дрон, 60 беспилотник па ветъёӊ молтас «Гром» нэмпи дрон па па каман сот пормас. Щи томпына, нийӆ батальон па Ямал мувна актам «Кречет» нэмпи хутсат дронна масайт, ляль порайна сэӊк ямас нятта питӆат.
«Тамхатӆ ляль пеӆа маты пормасат ар пелак щит — дронат па радиоэлекронной верат пиӆна лялесты пормасат. Муӊ лялесты ях пиӆна уйтантытэвна ӆув ивейна щит пущщи лавӆат, щимащ пормасат сэӊк сара сукаӆаӆат, щитна ар масӆ. Мета маса беспилотник муӊ ёрӆуна верӆу, мета маса лотӆу. Муӊ мала арат ёр тайӆу, аса ляль пеӆа китӆаӆӆу, мур тэӆна нятӆу», — Дмитрий Артюхов лавас.
Там уйтантопса алаӊна па Ямал мув губернатор ӆув кат турпи пасканӆ па 350 патрон СВО пеӆа масӆы. Лялесты ях лавты ясаӊна, щимащ пасканат дрон юватлиты ораӊна сэӊк ямат. Касаӊ муниципалитет Росгвардия эваӆт лавты ясаӊна, там ӆапат сыс холна 50 нэӊху пасканӆаӆ масӆаӆ.
СВО манты сыс мули кат щёрс молтас дрон щита китса, 650 квадрокоптер, щёрс ветсат рация, хутъёӊ щёрс молтас эӆ сайӆаман тайты пормас, катсат молтас машина, щи томпына мур тэӆна ӆытыт па партон китӆа.
Вера Лонгортова хансам потар
Авторы
Лух Авт
Темы