Лух Авт
Ӆапатнаңк вошан Ворңа хатӆ постаса
Выӆпосӆ ёхан питаран, хота ӆапат наңк юх энамаӆ, порыӆыты хар уӆ. Ӆапатнаңк вошан уӆты ханты хоятат кашң товийн щита яха актащӆат, порыӆыӆат. Хащам сусан катра курт воӆ каш верты па щутщаты щира хорамаңа ӆэщатса. Щит ураңан Ворңа хатӆ оӆаң пуш яӆпа верам харан постаса. Еӆпи вошң хоятат кеша емаң хатӆ каш верты хот пуңаӆан ӆэщатыса.
Емаң харан «Сорни най» ханты арат арыты нэңат пиӆан уйтантысам. Мет ун нэңаӆ — Надежда Ивановна Скубко (Куртямова) инщассэм, хоты ӆув там вошан уӆты питас па ханты нэм тайты ун рущь вошан Ворңа хатӆ постаты питса.
«Ашкуӆа етшамеман хутхощъяң таӆ манэм ус. Ӆухаснэңӆам пиӆан утаӆтыты там воша ёхатсув. Хот верты, оляпан нёсытты рупата пеӆа утаӆтысув. Там таӆ хутъяң пеӆа хут таӆа йиӆ, хоты ма ма ёшӆаман верам вошеман уӆӆам. Тата похңаӆам энамсаңан. Ун похем Ӆапатңаңк куртан сэма питас. Ай похем сэма питмаӆан куртэв вош нэман юкантса.
Щи порайн Виктор Семёнович Воронин вош куща ху хоща оӆаң ӆаңкар кущая рупитас. Ӆапатнаңк вошан Ассоциация «Ямал — потомкам!» мет оӆаң кущая Клавдия Михайловна Кваша (Артанзеева) ус. Мин Клавдия Михайловна пиӆн номас версаман уӆты вошеван Ворңа хатӆ постаты па айкеӆ пиӆн горисполком хота Виктор Семёнович хоща мантсаман. Ӆув еӆ нюхмас:
– Ворңа хатӆ ма урңеман верӆаты? Опращ нэмем тохи хойӆ?
Мин ястаӆман:
– Анта. Ханты мир катра пора эӆты Ворңа хатӆ постаӆат. Товийн ӆув, тохӆаң войт кутан, мет оӆңа Овс мува ёхатаӆ, хошам туӆ.
– Щит шеңк ям! Ям вер! Ма нынан нётӆаӆӆам. Охан маӆӆам. — Виктор Семёнович мохты кашащас.
– Емаң хатӆ мосаӆ щиты ӆэщатты, па хоятата сама ат хойӆ. Вошеван еӆӆы, кашң таӆ тамащ емаң хатӆ постаты питӆув. Катра верат нумман мосаӆ тайты.
Сценарий ханшты Пулңават вош ОЦНК хотан рупитты хоятатан нётсаюв. Ӆапатнаңка Юлия Николаевна Накова па Сергей Валентинович Худи емаң хатӆ туты китсайңан. Щи порайн ӆын айӆат ёх, институт етшаман юпийн, веӆщишак рупитты питсаңан. Щиты мет оӆаң пуш 1991-мет таӆан Ворңа хатӆ вошеван постасэв.
Ин ёхӆы аңкармаман муй арат таӆ хащас. Вошан уӆты хоятат яма уятӆат хантэт щит хойтат. Муй хорпи емаң хатӆат тайӆат, хоты уӆӆат па муй хошӆат верты. Вош нэмеӆ муй ясаң эӆты тыйман уӆ».
Вошан уӆты хоятат шеңк самаңа ханты емаң хатӆ тайӆэӆ. Муйкем ищки вотаң хатӆ ус, ищипа каш верты хара ёхатсат. Яма ёнтсат, арысат, яксат, кассат. Ям ясаң па тумтак уӆапса номас китман, порыӆыты харан щашкан ӆэрат ярсат, ох понтсат.
Зоя Куртямова ханшам потар
Авторы
Лух Авт
Темы