Лух Авт
Апраӊ, каркам па рэняӊ ханты ёх юрӆаӆ артаӆасат
Кашӊ таӆ округ хуват манты вуӆы ёх емаӊ хатӆатан тащан яӊхты хоятат касты харатан уйтантыӆат. Тампуш Надым мува Ӆорвош район эӆты тасян яӊхты па Пулӊават вошан Ямальской многопрофильной колледжан утаӆтыты хоятат ёхтыӆысат. Си тумпийн Ёмвош округ па Надымской район эӆты ханты хоятат па усат. Там лопасан касты ёх эӆты потрэм туӆэм.
Питӆор куртаӊ хоят
Касты хара яӊхам похӆув ар пелак тащан яӊхты ёх. Йи пох туп хуӆ веӆпасӆаты хоттэӆ эӆты. Хуӆам похев колледжан утаӆтыйӆ. Хоӆ ханты уӆапсаев еӆӆы туӆат.
Муй хорпи касапсайн касас, хоты уӆапсайӆ манаӆ, Питӆор эӆты ёхтыӆыйм Василий Владимирович Максаров ясаӊ верас: «Ма тащан яӊхӆам. Касты тахайн ӆохан нёхамтысам па тынсяӊ ёваӆмисам. Надым вошан кимет пуш усам. Няӆ таӆ хасяс, хоты ты ёхтыӆысам. Си порайн аӆ вантты яӊхсам. Ин па касты вохиӆысайм. Муӊ хут хоят усув. Хой тынсяӊ ёваӆмас, хой ухаӆ шоппи наврыӆыйс, хой па ӆохан хухатӆыйс.
Ашкуӆа етшамем юпийн, мохты аӊкем-асем пиӆан вуӆы хотан яӊхсам. Асем — Владимир Егорович Максаров, аӊкем — Ольга Дмитриевна Максарова. Ин хоӆна нётман яӊхӆаӊан.
Муӊ Горковской совхоза ӆуӊтасӆув, хуӆмет тасян рупитӆам. Няӆ хоттэӆ, хуӆам хотан уӆӆув. Хоӆна яйем — Николай Владимирович муӊ пиӆэван яӊхаӆ. Еша уӆ, ӆуӊ тахая, Воркута пеӆа касаӆӆув. Таӆан Ӆорвош район Хоӆца ӆор пуӊаӆан ӆойӆув. Вуӆы антом шеӊк ар тайӆув. Совхоза вуӆы нёхи маты хоятӆув кутан оӆаӊ тахайн уӆӆув. Яӆап таӆ еӆпийн вуӆыӆув хорсув».
Колледжан утаӆтыты Овкурт похӊан
Овкурт эӆты Ямальской многопрофильной колледжан утаӆтыты энамты похӊан — Яков Артёмович Куртямов па Юрий Константинович Лонгортов усӊан, потар тусӊан.
Яков Куртямов ситы ястас: «Ма Овкурт эӆты уӆӆам. Пулӊават вошан многопрофильной колледжан оӆаӊ курсан вуӆы яммаӆтыты леккара утаӆтыӆам. Надым воша па оӆаӊ пуш ёхтыӆысам. Нэмоӆты порайн касты ант яӊхиӆысам. Оӆаӊ пуш тамась тахая пиӆтасьсам. Тата ухаӆ шоппи наварсам, тынсяӊ сува ёваӆсам, хуӆам пуш навармисам па ӆохан хухатӆыты эстафетайн кассам».
Юрий Лонгортов па ясаӊ верас: «Ма па Пулӊават вошан утаӆтыӆам. Овкурт эӆты, аӊкем-асем хуӆ веӆпасӆаты хоятӊан. Оволаӊкуртан хуӆ веӆман уӆӆаӊан. Ашкуӆа эӆты касапсаята яӊхты питсам. Ин па округ хуват манты касапсаята пиӆтасиӆам. Колледжан муӊев Денис Сергеевич Лонгортов касапсаята ӆэсятӆаӆӆы. Ты па ӆув тутӆысӆы».
Мужевской совхозан рупитты ху
Надым воша Мужи вош эӆты хоӆна Станислав Юрьевич Рохтымов ёхтыӆыйс. Ӆув тащан яӊхаӆ. Оӆаӊ пуш там мува ёхтыӆыйс. Касты тахайн ӆохан хухатӆыты эстафетайн касас па тынсяӊ сува ёваӆмас.
Уӆапсайӆ эӆты потар тус: «Ма рутӆам, аӊкем Ульяна Григорьевна пиӆан тащан яӊхӆам. Мужевской совхозан кимет тасян рупитӆам. Евгений Анатольевич Талигин бригадира уӆ. Хуӆам хотан уӆӆув.
Ешауӆ ӆуӊ тахайӆува, Саран мув пеӆа касаӆты питӆув. Муӊ ун кер тыӆась хасям хатӆатан маныӆыӆув. Ёхӆы па Ас потты тыӆасян керӆаӆув. Таӆан Ёханкурт эӆты хольмаӊ километрайн ӆойӆув. Совхоз тумпийн, муӊ ёра вуӆэт па тайӆув. Хасям таӆ етшаты еӆпийн ветъяӊкем вуӆы хорты мийӆысув.
Ма хоӆна Ӆорвош районан манты вуӆы ёх емаӊ хатӆа яӊхты утсиӆам, сита касты питӆам».
Оӆаӊ пуш округеван кассат
Си еӆпийн, Ёмвош округ эӆты хоятат касты ант ёхтыӆысат. Туп вуӆы ухӆат этаӆтысат па вуӆы ухаӆан навраӆтысат. Тампуш таӆаӊ команда ӆэсятса.
Касты хоятат кутан Владимир Алексеевич Итыков Сургутской район эӆты ус. Каматса ясаӊ ястас: «Тампуш Ёмвош округ эӆты касты хоятат вохсайт. Сишан муӊ команда акатсув па ты ёхатсув. Си еӆпийн муӊ туп муӊ округеван вуӆы ёх емаӊ хатӆатан кассув. Ма оӆаӊ пуш там вошан усам. Хоятӆув ты емаӊ хатӆ вантты ёхтыӆысат. Касты сирн ант яӊхсув. Тата ма тынсяӊ сува ёваӆмисам, юх таӆсам па пертысыман юрасьсам. Командая ӆуӊтасты хоятат этнобиатлонан па ӆохан хатэмиты эстафетайн кассат».
Надымской район этаӆтыйм ёх
Надым вошан манты емаӊ хатӆата ар пелак ур хоятат ёхтыӆыӆат. Тампуш ар ханты хоят шияӆаты рахас. Ар касты хоят ус. Надымской район этаӆтыты ханты хоятат па ёхтыӆысат. Яӊ хоят ус.
Муй касапсайн кассат, Виталий Степанович Мултанов ясаӊ тус: «Ма Муравленко вош эӆты ты ёхтыӆысам. Хут хоят Муравленко вош эӆты ус, няӆ — Надым вош эӆты. Муӊ антом кашӊ таӆ касты яӊхӆув. Няӆ таӆ сыс йи пуш туп актащӆув. Антом кашӊ касапсайн касӆув. Ар пелак этнобиатлонан, ӆохан хухатӆыты эстафетайн па тынсяӊ сува ёваӆӆув.
Ма Надым лепан касаӆӆам, вуӆы шавиман уӆӆам. Аӊкем-асем Ёмвош округ Сургутской район эӆты уӆӆаӊан. Аӊкем Конкин рут эӆты. Ӆын сита уӆӆаӊан.
Муӊ йи тахайн касӆыӆув, таӆ-ӆуӊ лотӆув хольмаӊ-ветъяӊ километрайн уӆӆат. Вуӆыӆув товийн нюрма воштаӆӆув, таӆан унтан яӊхӆат, коралян уӆӆат».
Альбина Тырлина ханшам потар
Авторы
Лух Авт
Темы