обновлено: 09:47, 03 августа 2026
Лух Авт
Ар хуӆ мощатам ёх
Таӆ шуп хащам юпийн, хуӆ веӆпасӆаты рупитты харат кутан артаӆаса, хой мет ар хуӆ мас. Там пора унты, округ хуват, ӆоватаӆан хуӆам щёрас пеӆа нийӆсот моӆтас тонна хуӆ мощатса. Туняӆ, йи там порайн хуӆам щёрас пеӆа катсот моӆтас тонна туп маса.
«Кев сыӆ район хуӆ веӆпасӆаты ёх ӆапатсот моӆтас тонна хуӆ масат. Округ хуват щит мет аршак, щитэӆан ӆув оӆаӊ тахая этсат. Ӆув юпеӆан Ӆорвош район, еша ёӆта хащсат, ӆапатсот пеӆа няӆхощъяӊ тонна хуӆ мощатсат. Тазовской район хуӆмет тахайн — мощатам хуӆэӆ няӆсот моӆтас тонная туп этас.
Тампуш, рупитты хоятӆув ар пелак ёханатан па ӆоратан веӆпасӆысат. Молам щарс мув сыӆан мийм хуӆаӆ йи ветмет шупа ант ёхатаӆ. Ӆашкупата па хуӆ потаӆтаты хотата аршак питы хуӆ маӆа. Нови хуӆ шимаӆ хойӆыйӆ.
Цифра ӆуӊатты хоты кен. Туп кашӊ тамащ ӆуӊатты нэпек юпийн ӆаварт рупата ӆойӆ па щи рупата верты хоятӆув. Нётапса туты щиран, кашӊ таӆ моӆтас рупитты тахайт пуншӆув, хуӆ маты тынаӆ эӆатӆэв. Веӆпасӆаты хоятӆув пиӆан уйтантыӆув, потрэмиӆув, инщасӆаӆӆув, хота муй вер хоӆна туӊматты мосаӆ», — АПК рупата верат туты департамент куща ху Андрей Рубашин ястас.
Туняӆ эӆты, округ хуват ярсот пеӆа хут хуӆ мощатты па ӆэщатты таха рупитаӆ. Щёрас моӆтас веӆпасӆаты ёх кутан, ар пелак шимӆаӊ рут мир хоятӆув рупитӆат.
Зоя Куртямова ханшам потар
