Лух Авт
Ар няврэмаӊ аӊкет касапса манаӆ
Ай тахайт потты тыӆащ хусмет хатаӆ вуш эӆты Ас потты тыӆащ хольмаӊ пеӆа няӆмет хатӆ унты Россия ӆоватан ар няврэмаӊ аӊкет «Богиня Богинь — 2024» касапса манаӆ. Щита касӆат тэӆаӊ хоттэӆ нэӊат, хойтат ху сайн уӆӆат.
Там Всероссийский конкурс кашӊ таӆ верыӆыӆа. Ӆув онӆайн формат щиран манаӆ. Кашӊ ар няврэмаӊ нэ ӆув хоттэӆ хоятӆаӆ эӆты «ВКонтакте» ханшаӆ, хорат понаӆ. Аратаӆ нэ ураӊан верам официальной группайн кашӊ пуш ханшиӆыӆа муй мосаӆ верты, касапсайн еӆӆы хатты ураӊан.
Кашӊ ай куртаӊ хоттэӆ хоятат ищи щий пиӆтащты верытӆат. Ӆоркурт эӆты Лидия Александровна Паршакова хоттэӆ хоятӆаӆ пиӆан касаӆ. Ӆув оӆаӊ партам верэӆ версэӆ, ин кимет партам вер пеӆа ӆэщатыӆат.
Ӆув ясӊаӆ эӆты: «Муӊ кашӊ пуш тамащ касапсаята пиӆтащиӆув. Муӊ семьяеван хуӆам няврэм тайӆув, йи пох, кат эви. Арпелак хоятат нумасӆат, ар няврэмаӊ хоттэӆатан ищимет няврэмат шукащман уӆӆат. Шимаӆ ёнтыӆыӆат, аршак рупитыӆыӆат, туп аӊкета-ащета иса нётыӆыӆат. Няврэмат шимаӆшак па няврэмат пиӆан ёнтӆат, уйтантыӆат. Туп там вер иса па щиран ӆойӆ, ар няврэмаӊ хоттэӆан ӆувиӆаӆа каш па умащ энамтыя.
Муӊ няврэмӆув моӆты ки верӆат — иса ияха. Кутӆаӆан нётасман уӆӆат, вещкатат. Щи веран муӊ ӆув пеӆаеӆ вантман ищи уӆапсаев умащшака йиӆ, ӆув верты верӆаӆа хоӆ ияха амтыӆыӆув.
Ар няврэмаӊ хоттэӆан кашӊ няврэм ӆувеӆа мосты па рахты вер вераӆ. Ант хошты тахайн аӊкеӆан па ащеӆан нётӆа, партӆа. Ияха унта яӊхиӆыӆув, хуӆ веӆпасӆаӆув, хоӆ йи пасан суран актащиӆув, ёнтӆув, вератӆув. Щит шеӊк тынаӊ, хун муӊ хоӆ ияха уӆӆув».
Шеӊк ям, хун тамиты ар хоттэӆ хоятат ӆув эӆтаеӆ потартыӆат, хорат алиӆыӆат. Щи порайн мосаӊ па хоттэӆат ищи ӆаӊхаты питӆат ар няврэм тайтыя, ёша-кура энмаӆтыя. Аршак няврэмаӊ хоттэӆатан арпелак аӊкет-ащет катна ант маныӆыӆат, пирщаматэӆ унты иса яха уӆӆыӆыӆат.
Аллина Тоярова ханшам потар
Авторы
Лух Авт
Темы