Лух Авт
Ар таӆ пучтайн рупитмаӆн мира щунь тус
Там товийн ун кер тыӆащ 15-мет хатаӆан ар таӆ пучтайн рупитам ханты ими Евдокия Иосифовна Денисюк (Миляхова) 75 таӆ постас. Щи хатаӆан ма ӆув хощайӆ мояңа яңхсам па ар хошам ясаң ястасам.
Евдокия Иосифовна Ямал мув Ӆорвош район Касам-Нёӆ куртан сэма питас, ӆув хоттэӆ хоятӆаӆ эӆты потартас:
– Ащем Иосиф Никитич Миляхов, антем Мария Ивановна Неттина усңан. Аньтем Машъяӆор куртан сэма питас. Ӆув ащеӆ Иван Григорьевич Неттин Воӆаң Ляльн Ленинград вош пуңаӆн лялясас, щита антома йис. Ун опращем Никита Дорофеевич Миляхов ищи ляля манас, Берлин вош унты воракат воштас, ёхи керӆас. Ӆув имеӆ Мария Петровна (эви опращ нэмӆ Яврова) ӆаварт ляль порайн утща няврэмӆаӆ энмаӆтас па тарма рупитас. Ащем ун яйӆ Пётр Никитич Миляхов ляльн ушас. Аңкаңкем Матрёна Степановна Енова (Шульгина) ӆаварт ляль порайн Машъяӆор куртан хут няврэм энмаӆтас. Ӆув иса порайн ляльн парам рут ёхӆаӆ эӆты шукаң арат арыйс.
Антем-ащем — вуӆэң ёха усңан, тащан пиӆн касаӆсаңан, щишн ма Тэк куртан аңкаңкем пиӆн усам. Ӆув куйп шепан имия ус, патлам хот, Пупи якхот верас, вой арат арыйс, ёш посӆ тайсаӆы, щишн мир лекщитас. Ун ащаращем Степан Иванович Енов ищи шепан икия ус.
Муң щемьяевн ӆапат няврэм энмас: ма, Тамара, Антонина, Зоя, Раиса, Яков па Сергей. Ин ма, Зоя, Раиса па Сергей хащсув, хоӆыева щутщаӆув. Ӆыв Суматвошн уӆӆат.
Тэк куртан Дуся эвие нулевой класса манас, ванты, рущ ясаң ант тайс. Няӆ класс етшаптамаӆ юпийн Суматвоша китса, щита Дуся интернатн ус. Ашкуӆайн яма утаӆтыйс, хор ханшты верӆ самаңа тайсаӆы. Арсыр хораң касопсэтн касас па нох питыӆыйс. ВЛКСМ таха ёх ӆувеӆа ястасат, ӆуӆн ӆув еӆӆы хор ханшты вера утаӆтыты тахая ат манас. Туп Дуся ант уйтас, муй щирн щий манты. Ванты, аңкаңкеӆ туп 12 шойт арат пенсия ох ёша вус, щишн ант уйтас, муй щирн хиӆнэңаӆ ун воша китты. Щи ӆуңан Муши курт эваӆт опращеӆ Никита Дорофеевич Миляхов ёхтас па щий тутӆыса. Мушийн Евдокия пучтайн рупитты питас. Щи юпийн Тюмень, еӆӆы Екатеринбург вошңана карты кеӆ хуват оператора утаӆтыты китса.
1972-мет таӆ вуш эӆты нэпекаң айӆат нэ Ямал мув арсыр куртатн пучтайтн рупитас, нумаӆмасӆы:
– Ванты, пучтайн «Сберкасса» ох маты таха ус, щишн ма кущая уӆмемн ӆапат нёӆаң револьвер пошкан тайсам. Щи порайн ма ащема ун пумащипа ястасам. Ванты, айтэӆн ӆув пиӆаӆн пошкан па нёӆат ӆэщатсам. Щи тумпийн ашкуӆайн «Начальная военная подготовка» урокн автомат Калашникова эӆты нёӆат эсаӆты утаӆтысув.
Питӆор куртан рупитмаӆн ӆув Александр Михайлович Бальчугов пиӆн уйтантыйс, икия манас. Еӆӆы няврэмат сэма питсат. Татья эвеӆ 1970-мет таӆн Ӆорвош район Ӆоркуртан, Александр похӆ 1972-мет таӆн Ямальской район Мыс-Каменный куртан па Марина мет ай эвеӆ 1974-мет таӆн Новый Порт куртатн сэма питсат. Интам Евдокия Иосифовна 9 хиӆы па йи хиӆы тумпи хиӆнэңаӆ тайӆ. Нумаӆмасӆы:
– Няврэмӆам ӆуң порайн Суматвош район Тэк куртан щутщасат. Щита аңкаңкеӆ рущ щирн потартты утаӆтасат. Ӆувиӆаӆа шеңк умащ щита щутщаты ус, ванты, вонщамотат акатсат, хуӆ веӆпасӆасат па торн сэварсат.
Щаӆта ӆув щемьяеӆа ун шук ёхтас — икеӆ антома йис. Щиты Евдокия Иосифовна утща няврэмӆаӆ энмаӆтас. Ар таӆ манас… Ӆув Виталий Дмитриевич Денисюк пиӆн уйтантас, хунты ӆын ияха Суматвошаң ашкуӆайн утаӆтысңан. Ӆув няврэмӆаӆ кеша ащи юкана йис.
2016-мет таӆ вуш эӆты Евдокия Иосифовна икеӆ пиӆн Ёмвошн уӆ. Ӆув айтэӆн ёнтасты, тыйты вер самаңа тайӆ, щишн щутщаман иса порайн моӆты верӆ.
Евдокия Иосифовна ар таӆ пучтайн рупитмаӆн арсыр ишакты нэпекат, «Ветеран труда» воӆаң нэм тайӆ.
Ешак Евдокия Иосифовна, пучтайн рупитменан наң ар хоята ой па амат тусан — куртаң мира пищмайт, телеграммайт, арсыр газетайт, журналат тусан, ӆыв карты кеӆ хуват рутӆаӆ па ӆухасӆаӆ пиӆн потартсат. Еӆӆы хув йис, хув нупат няврэмӆан па хиӆыӆан пиӆн тумтака уӆа!
Людмила Шульгина ханшам потар
Авторы
Лух Авт
Темы