Лух Авт
Арат, ӆуӊтарат ханшты нэ
Тата потрэм Светлана Павловна Кельчина эӆты туӆэм. Ӆув Ӆорвошан уӆ. Хуван ӆув пиӆэӆан уйтантыты вутсисам. Хуӆӆысэм, ӆув «Сорни най» группая арат ханшаӆ. Хоӆна ӆуӊтарат ханшты нэ.
Аӊкеӆ-асеӆ нумман тайӆаӆӆы
Светлана Павловна Катравошан сэма питас. Ащеӆ шуӊат Павел Николаевич Кондыгин, Ванты ху. Эвеӆ аӊкеӆ-асеӆ эӆты потар тус: «Муӊ Вантыйн, Тушвошан усув. Асем шуӊат таӆан ӆован почта тутӆыман рупитас. Си порайн ин яӊхты тохӆаӊ хопат антомат усат. Ӆуӊан хуӆ, вой веӆман ус.
Ӆув Воӆаӊ Лялян няӆ таӆ лялясман ус. Оӆаӊ ийимеӆ Катравош нэ. Ляль эӆты Катравоша ёхӆы ёхтас. Лялян уӆмаӆ сыс, эвеӆ няӆ таӆ ӆовата йис, Ӆорвошан хотан маса. Яйӆаӆ, апсиӆаӆ Вантыйн усат.
Катра порайн, хоӆта хоят кураӆ пурамаӆ, мохты курт нэм тыйӆ.
– Ванта, курт си. Ситы Ванты тыйс, русь ясаӊан Вандиязы. Шиянпухар, Тушвош — ин Лысой горая аяӆӆа. Симась нэмат си уӆӆат.
Хун ма сэма питсам, асеван муӊ мохты Ӆорвоша туӆаюв. Муӊев туп касӆаптаӆӆы, мохты антома йиӆ. Сит 1962-мет таӆ ус. Си пора эӆты, Ӆорвошан уӆӆув. Ин няӆ няврэм туп хасьсув. Аӊкем рупитты питас. Нэмаӆ — Елена Андреевна Еприна. Асов эӆты ус. Мис хотан, юхат няврэм шавиты хотан рупитас. Ар рупата верас».
Ӆув уӆты уӆапсайӆ
Светлана Павловна ийикеӆ Аркадий Александрович Кельчин пиӆан ярхус таӆ яха усӊан. Яртъяӊ няврэм тайсаӊан. Уӆапсайӆ эӆты па каматса ясаӊ ястас: «Мин Ӆорвошан усман. Ийикем хуӆ веӆман ус. Ун аӊкеӆан Ӆорвошан энмаӆса. Ӆув опрась нэмаӆ Лонгортов. Ма нянь верты хотан рупитсам па ийикема нётсам.
Там мосванан, таӆ моӆтаса йис, ай похем Степан Аркадьевич Кельчин, нэпекан ёхатсаюв, ушас. Ӆэхуем, апсем похаӆ Станислав Романович Кондыгин пиӆан, СВО хося маныӆысӊан. Яха ушсаӊан. Нопсэм сикуш еӆӆы понӆэм. Ӆыпем вевтам. Сикуш каншӆэв. Хоты нэрыӆув, еӆӆы уӆты па мосаӆ. «Сорни най» группаеван арыты нэӊӆаман пойкӆайм.
Катра порайн аӊкиӆув, ун аӊкиӆув, ун асиӆув арыйм арат нумӆаӆӆам. Муй сиӆта хуӆантысам, еша ясаӊан нётапӆам, туӊа верӆаӆӆам. Си ар соват еша арэмиӆам. Ун асиӆув монсям монсят хуӆантсув. Мет осьхуль тахая ёхатӆат, воӆыӆат. Кимет хатаӆан потрэӆ еӆӆы туӆэӆ. Си онтасан, ситы си усув. Хун ма ма няврэмӆам энмаӆты питсам, иси хота ишкансяпан нётыӆысӆам, хота вояӆты аран арысӆам».
Муй сирн ханшты питас
Светлана Павловна ай пора эӆты хуӆантты, арыты, ханшты ой тайс таӊха. Уӆтаӆ сыс, иса симась хоятат ӆув пуӊӆэӆан усат. Ай порайн — ун аӊкиӆаӆ, ун асиӆаӆ. Асован апсиӆаӆ хося, 1973-мет таӆан уӆмаӆан, оӆаӊ ӆуӊтарат ханшты питас. Сита Прокопий Ермолаевич нэпек уйтас. Оӆӊа ӆув ханшам ӆуӊтарӆаӆ емаӊ хатӆатан ӆуӊтыӆыйс. Сит эӆты па потар тус: «Прокопий Ермолаевич — сит ма киӆэм, опем ики. Ӆув шеӊк ар монсь, ӆуӊтар ханшиӆыйс. Кашӊ ханты курта яӊхас. Хота хуӆ веӆты таха, ныкӆы, нохӆы манаӆ. Хоты хуӆ веӆты хоятат усат, муй версат, иса вантас. Си хорпи хоят ус. Нэпеки хираӆ аӆэмаӆӆы, шанша понапӆаӆӆы па ханшаӆ. Муй ант уятты ясаӊӆаӆ, нэпека мохты ханшапӆаӆӆы. Ясаӊ сит ар сыра манаӆ. Нумшак хоятат нумшак ясаӊан потартӆат. Ным хантэт — ным ясаӊан. Иса нэпека постасӆы. Ар пелак хуӆ веӆты хоятат эӆты ханшас».
Ин Светлана Павловна пенсияйн уӆ, арыты яӊхаӆ. Емаӊ хатӆата арат, ӆуӊтарат ханшты питас. Унта яӊхтаӆ порайн, потрат этӆат. Нэпека ант ханшӆаӆӆы, иса нумман тайӆаӆӆы. Па ишан, Светлана Павловна ханшам ӆуӊтарӆаӆ хоӆна поныӆыӆув. Тумтак ёш, тумтак кур ӆувеӆа!
Альбина Тырлина ханшам потар
Авторы
Лух Авт
Темы