Лух Авт
«Арктической Олимпиада» кат хатӆ манаӆ
Тамхатӆ Пулңават вошан рут ясаң па уӆты мув ямас уйтты щиран «Арктическая Олимпиада» пуншса. Няврэмат па ӆувиӆаӆ утаӆтыты нэңат-ёхат ар мув суң эӆты ёхатсат. Красноярской край эӆты хонна хоятат тый пиӆтащсат.
Кашң таӆ Ольга Николаевна Пандо Аксарка эӆты няврэмат рут ясңаң олимпиадая тутӆыӆӆы. Туняӆ Светлана Тайшина нох питас. Щишан там пуш там касапсая ант ёхтас. Ӆув юраӆ па щёмаӆ артаӆатыя Леонид Кондыгин ёхтас, ӆув 9-мет классан утаӆтыйӆ. Аңкеӆ-ащеӆ Байдарацкой нюраман вуӆы хотан уӆӆаңан. Ханты ясаң уйтты няврэмат эӆты каматса ясаң Ольга Николаевна ястас: «Хащам таӆатан, мет шопаң, куртаң няврэмат воӆаң ханты ясаң ант уйтӆат. Аңкиӆаӆ-ащиӆаӆ пиӆан ёӆан ант потартыӆат. Тащ хотаң няврэмат ханты ясңеӆ тайӆэӆ, яма хошӆэӆ. Щаль куш, тухаӆ семьяятан ищи арпелак рущ ясаң суран потарӆат. Ханты ясаң яма уйтты па хошты няврэмат пиӆан ма рупитӆам. Ӆув сочиненияйт ханштэӆ порайн иса ӆыпи ханты щащеӆ понӆат, ханты щиран нумасӆат. Щит шеңк ям. Ӆув ханшты потарӆаӆ ӆуңатты умащ. Ма нумастэман, тамащ няврэмат онтасан ханты ясңев ант ушаӆ».
Там пуш Восяхово эӆты няврэмат ханты ясңа утаӆтыты ху Алексей Эдуардович Конев кат няврэм касты хара тус. Щит эӆты каматса ясаң ястас: «Ин там касапсая кат няврэмем пиӆан ёхатсам — щит Анастасия Озелова, ӆув 11-мет классан утаӆтыйӆ, рут ясаңан потрат па па рупатайт верты питаӆ. Краеведение щиран Данил Озелов, ӆув 9-мет классан утаӆтыйӆ. Ӆын районной Олимпиадайн нох питсаңан, яма ханты ясаңан хошӆаңан, аңкиӆаӆ-ащиӆаӆ тащан яңхӆат. Муң мет оӆаң пуш тамащ касапсая ёхатсув. Нумастэман, па хоятат пиӆан артаӆаман, ёхӆы ант хащӆув».
Муң, «ӅУХ АВТ» редакцияйн рупитты хоятат ищи кашң таӆ жюри щиран там «Арктической Олимпиадая» пиӆтащиӆув, артаӆыӆув, мата няврэмат ханты ясаң шеңк яма уйтӆат па ханты щащ тайӆат. Ванты, еӆӆы хатӆатан номас тайӆув, ханты ясаң еӆӆы туты щиран щи няврэмат муң хощаев рупатая вутыя.
Аллина Тоярова ханшам потар
Авторы
Лух Авт
Темы