обновлено: 11:31, 24 июля 2024
Лух Авт
Арктической велогонка касапса манас
Хащам щутщаты хатӆатан «Arctic Bike Trail» касапса ус. Урал кев юш хуват Рай-Из кев унты велосипедан хатмиман манты. Юшаӆ, тыеӆ-тохеӆ хуватаӆн, «Профи» категорияйн няӆъяң километра, «Любители» хольмаң пеӆа хут километра манты мосас.
Округ ёх тумпийн, Хон мувев ун вошат эӆты мойң хоятат касты па ёхтыӆысат. Нэңат кутан Ӆорвош район каркам, апраң эвиет мойӆаптаты оӆаң местаята этсат. Хоты касапса манас, Вероника Дмитриева пиӆан потартсаман.
«Тамащ касапсая ма хуӆмет пуш ёхатсам. Ийикем, Павел Дмитриев кимет пуш. Туняӆ ӆув, ӆув ӆоват ёх хоятат кутан, кимет местая этас. Ма па кашң таӆ хатман хуӆмет, кимет, там пуш оӆаңмет места вусам. Хольмаң щёрас соӆкува охан мойӆасайм. Ольга Лобанова опем, ищи мин пиӆэман касты хара хущсэман. Ӆув оӆаң пуш яңхас па касапса соханты пос унты хуӆмет ёхтас. Нелли Куртямова «Профи» категорияйн кимет места вус.
Касапса еӆпийн муң Пулңават вошан кашң хатӆ етна пелка велосипедан хатмисув. Рупатая па велосипедан яңхӆув. Хатӆ сыс яңхман, катхощъяң эӆты хольмаң километра арат унты акмаӆ.
Там пуш товев шеңк хув ус, йиңкаӆ ун па мувев яма ант сорас. Манты юшев еша ӆаварт ус. Нюрм харӆаӆ йиңкаңат, хота кеваң, хота вощлах. Тухаӆ йиңк лотӆаӆ шанш унты ёхатӆат. Тохеӆ касман манмеван шома охан хатмиман нэмоӆты ант ныса. Ёхӆы аяӆта шушман нумассув: «Тата манман, амуй щиран иӆ ант ракантсув?!» Пирам, пеӆңа тэӆые. Ёшан хоӆ вощематы кум антом. Щиты щи порсаюв. Хота рэп ӆоңӆа велосипедӆув ӆаңкра вощкаман аӆсаӆӆув. Муйкем ӆаварт касты ус, ищипа ям.
Ун вош эӆты хувашак мантыйн, ӆаӆты ӆыӆ шув сыстам, восты лыптаң юхат аӆ ӆоймтыӆат, арсыр хорам лыптат энамӆат, ӆэпат ванши торн, кев ёхан йиңкаӆ аӆ ӆурыйӆ. Сам ӆыпийн аматман, щикем кен па ям», — Вероника Дмитриева ястас.
Айӆат ёх няврэмата ястаты утщиӆам. Телевизор па телефон пеӆа вантман ёӆан аӆ омпсаты. Тамащ хошам ям хатӆатан камн шушиӆыяты, ёнтаты, хухатӆыяты. Моӆты хоятата ям нётты верат вераты. Касты харат манты тахаята пиӆтащаты.
Зоя Куртямова ханшам потар
