Лух Авт
Арсыр юхат энмаӆты таха
Щи таха Свердловской область Артёмовской район Сарафаново куртан, офисӊан Артёмовской па Екатеринбург вошӊанан уӆӆат. Там таха кущайт ар таӆ Югра мув лесничествайт па юх сэвартты ёх пиӆн рупитӆат, ӆывеӆа мосты юхат китӆат.
Хув сыс Ханты-Мансийской округ ёх пиӆн рупитман щи таха хоятат кашӊ пуш Ёмвоша «Лесной форум» вантопсая ёхтыӆыӆат. Щита ма там таха менеджер нэ Светлана Пронская пиӆн уйтантысам па арсыр верат эӆты инщассам.
Ӆув ястас, щи ун таха яӊ моӆтас таӆ рупитӆ, щита 700 гектар мув хуватан арсыр юхат энмаӆӆайт. Щи таха ищимащ вер туты ёх нэман ассоциацияя ӆуӊатман уӆ. Щита кат тахеӊан хоща 200 моӆтас хоят рупитӆ, йи тахайн хоятат юхат энмаӆӆат, кимет тахайн — мув яӆпатӆат. Хоӆыена рупатнекат щи вера нэман Екатеринбург вошаӊ Уральской государственной лесотехнической университетан утаӆтысат. Щи тумпийн па ёх юхат тыныты вер туӆат, щи таха эӆты таӆ сыс иса Россияев, Казахстан па па ванан уӆты муват хуватан машинаятн яӊ миллион арат арсыр юхат туӆайт. «Муӊ, ванты, нэман тендер хуват энмаӆтам юхат тыныты вер ӆэщатӆув. Югра мува кашӊ сус муй товийн арсыр юхат пиӆн 4-5 машина йиӆ. Щит лесничествайт па юхат сэварты тахайт ёх ӆутӆат. Ванты, Россия мув постапса щирн, муйкем арат юхат сэварсан, щи арат ёхӆы омасты мосӆ», — Светлана Пронская ястас.
Светлана Пронская айкеӆ тус, ӆув рупатнекӆаӆ Россия мувев хуватан яӊхман лесничествайт хоща арсыр юхат сэмат акатӆат, ӆуӆн еӆӆы энмаӆты. Щишн ӆув хощаеӆ арсыр юхат уӆӆат. «Кашӊ юх арсыр щирн энмаӆ, итухӆ юх йи-кат таӆ, итухӆ — хуӆам-няӆ таӆат. Ванты, унши юх эӆты потартты ки, теплицайн сорашак энмаӆ, турам иӆпийн хувшак. Щи пора сыс муӊ рупатнекӆув щи юхат яма па туса вантман тайӆат. Итухӆ ӆуӊ порайн муӊева айӆат ёх па няврэмат нётӆат», –вантопсая ёхтам мойӊ нэ ястас.
Ӆув эӆтэӆ оша йис, ун кирпащ хотат омасты ёх пиӆн ищи рупитӆат, щий бригада хоятат яӊхӆат па хотат пуӊаӆн арсыр хорамаӊ юхат омасӆат.
Светлана Пронская ястас, ӆув хощаеӆ ванкутн ашкуӆаятн муй университетн утаӆтыты няврэмат па айӆат хоятат мояӊа ёхтыӆыӆат. Итухӆ хоятат аӆ щирн ӆув тахеӆ вантты муй рупатаеӆ эӆты оша верты, итухӆ хоятат нётты щира. Нэман университетн утаӆтыты айӆат ёх практика щира рупитты ёхтыӆыӆат. «Айтэӆн няврэмат мув-авт самаӊа тайты утаӆтаты мосӆ. Ин муӊ тахев кущая Алексей Анатольевич Любимов уӆ, еӆпи ӆув ащеӆ щи вер тус. Алексей, ванты, айтэӆн вантас, муйсыр мосты рупата ӆув ащеӆ туӆ, щишн ӆув верӆ еӆӆы туты щи питас», — Светлана Пронская ястас.
Мояӊ нэ ястас, ӆув Россия мувев па ищимащ юхат энамты тахайт хоятат и номасн, и ёшн рупитӆат, итухӆ порайн моӆты юх ант тайӆат ки, па питомникат эӆты ӆувеӆа китӆайт. Ванкутн арсыр вантопсэтн уйтантыӆат. Вантопсэтн ищи ӆув мосты рупатаеӆ эӆты айкеӆ туӆа, щи тумпийн тата имохты арсыр веӆщи энмам юхат ӆутты рахӆ.
Ёхи хащам артан Светлана ястас, мосты юхат ӆутты ӆаӊхаӆайты ки, щи сайт spr-tura хуща вохты нэпек ханшты рахӆ.
Людмила Шульгина ханшам потар
Авторы
Лух Авт
Темы