Лух Авт
Артиллерия – специальной военной операция хоща ӆуӊха уӆ
Специальной военной операция питщам вуш эӆты муӊ ханты ёхӆув ёӆан ищи ант хащсат. Хойтат мобилизация уӆам порайн акатсайт, хой па ӆув муваӆ эӆты самаӆ хошиман актащас, па доброволец щиран манас. Ванты, арпелак хоятӆув хонна нумӆат, хоты ӆув овращӆаӆ па ун овращӆаӆ Ун Ляля яӊхиӆысат, мувеӆ шавиӆысат. Тата потрэм туӆэм там хатӆатан СВО хоща уӆты Валерий Молданов эӆты.
Там айӆат ёхев вой-хуӆ веӆпасӆаты хоттэӆ семьяйн энмас. Ай пора эӆты ащеӆ пиӆан веӆпасӆаты яӊхас. Щишан шеӊк яма уйтӆаӆӆы, хоты мосаӆ пошкан катаӆты, ӆыс па картсэсы омасты. Хуӆ веӆты ки манаӆ: ӆоваӆты, мотур сухтаты, хоӆап омасты — иса хошаӆ.
Ванзеват куртан энмас па утаӆтыйс. Щи юпийн авиалесоохрана хоща, тохӆаӊ хоп эӆты унт шавиты тахайн рупитас. Специальной военной операция питщам порайн лялясты хара актащас.
– Валерий, муя наӊ лялясты хара сонтамасан?
– Хонна 2014-мет таӆ эӆты иса айкеӆат ёхтыӆысат, хоты Донбасс хоща хоятат веӆӆайт. Няврэмат, ун хоятат мушамӆат па сорма питӆат. Щит шеӊк шукаӊ вер. Щишан, унашак ювмем юпийн номас понтсам щий яӊхты па щита уӆты хоятата нётты. Щи тумпийн ма щёмем па юрэм ищи артаӆатыя.
– Хоты сахат щиты тыйс, наӊ «Хант» позывной вусан?
– Ма ванты ханты, щишан шеӊк хув ант нумасман щимащ «Хант» нэм вусам. Па мир кутан уӆман хоятат уятты питсат, хой щит хантэт. Инщасӆат хоты муӊ уӆӆув, муй щиран веӆпасӆаӆув, муя па йи курт эӆты кимет курта касӆыӆув, хоты сахат па муй эӆты пормасат туса верӆув. Щит эӆты ма иса потартыӆам.
– Артиллерия хоща муй щиран питсан?
– Ма лялясты хара ёхатмем порайн артиллерияя хоятат пирысайт. Щишан ма щиты артиллерияя питсам. Кашӊ хоят муй верты хошаӆ, щёмаӆ уӆ, щий щи манаӆ. Ма ин 152-мм гаубичной буксируемой установкая Д-20 понман уӆӆам, пошкан турэм снарядан понӆэм.
Там йисан ляль па щиран манты питас, муӊ ун ащикиӆув па ун овращӆув лялясам щир эӆты. Ин ар вер артиллерия эӆты ӆойӆ. Туп муӊева ищи ӆавӆасман уӆты мосаӆ. Щишан катӆэм пуш орэмаӆув, щаӆта па тахая манӆув. Ванты, тум пелакан уӆты нацистат муӊев ант ат кащаӆасэӆ, хота муӊ уӆӆув. Муӊ взводэв хоща ветъяӊ пеӆа кат хоят, хут орудий хоща ӆапат хоятан рупитӆув. Атаӊ-хатаӆ орытӆув. Шеӊк иляптэван, хонна оӆты кум ант тайӆув.
– Наӊ уӆты харэнан ханты похат па уӆӆат?
– Уӆӆат. ХМАО-Югра па ЯНАО эӆты. Арпелак ёх ӆув добровольцат щиран там ляль хара питсат. Кашӊ хоят ӆаӊхаӆ ляльӆы уӆты, няврэмӆаӆ тумтака ат энапсат, аӊкиӆаӆ-ащиӆаӆ тумтака ат усат. Щи веран щи мувев сайӆаты йиӆат. Ма нумастэман, еша хащас, СВО хоща нох питӆув па рутӆув пиӆан уйтантыӆув.
– Валерий, пумащипа наӊен там потрэн ураӊан! Ӆыӆӆан шавияӆан па тумтакан ёхӆы ёхтаты!
Аллина Тоярова ханшам потар
Авторы
Лух Авт
Темы