Лух Авт
Ащеӆ-антеӆ вер еӆӆы туӆ
Кашӊ хоят, уӆтаӆ хуват, ӆув сама рахты вер мощатаӆ. Ун вошатан рупата ар, щишан хоятат тохи рупитты манӆат. Хой па ӆув ай куртыеӆан еӆӆы уӆты па рупитты номас тайӆ. Илья Леонидович Пугурчин щимащ номас верас.
Ӆув Овкуртан сэма питас. Щита ашкуӆайн утаӆтыйс па ус. Хун СВО ляль питас, мохты нумасты питас — шоши муваӆа нётты мосаӆ. 2024-мет таӆ сус порайн, Министерство обороны РФ пиӆан, контракт ханшӆтас. Донецкой Народной Республика аратыман 87-мет батальонан лялясас. «За отвагу» меваӆ посан мойӆаптаса.
– Ляльсты харан такан мушмаӆтсайм, кат атаӊ-хатӆ ёхӆам пеӆа ваӊксам. Моӆты кут щах ракантсам. Леккар хотан туп нох сайкапсам. Щита яммаӆсайм па 2025-мет таӆан ёхи китсайм, — Илья Леонидович ястас. — Куртэван рупата антом. Щишан нумаӆмасэм, хоты ащем-антем мисат энмаӆман тайсат. Щи вер нох ӆэщатты па еӆӆы туты номас понтсам. «Реализуй себя — открой свое дело» сервис щиран грант мощатты фонд «Защитники отечества» хуват нётсайм. Ветсот щёрас ох соӆкувайн митаӆысайм. Тампуш альпийской нэмпи хуӆам па кутумской нэмпи кат ош пошхат ӆутсам. Ин ӆувиӆаӆ энмаӆӆаӆам. Комбикорм хират ӆутсам. Таӆ кеша торн сэварӆам. Сус унты пушасэм етшаптаты мосаӆ. Вой пиӆан рупата ар, иса нёхамтыӆа. Еӆӆы хоӆна ай мис ӆутты утщиӆам.
Хой ищи щиты ӆув шоши вераӆ туты ӆаӊхаӆ, верытӆат грант щира заявка ханшты. Хоятата, хой ай вошатан па куртатан ёра вер верман уӆ 2019-мет таӆ вуш эӆты, кашӊ таӆ, 100 миллион моӆтас ох мийӆыса. Тампуш департамент АПК хоща грантовой заявкайт уйт ӆор тыӆащ 27-мет хатӆ эӆты унт ӆор тыӆащ 25-мет хатӆ унты ӆаваӆӆайт. Хой номас тайӆ, там QR-код хуват ӆоӊаты, ӆуӊтаты па заявка китаты. Моӆты инщасты вер тайӆаты ки, там телефон хуват потартаты: 8 (349 22) 6-71-86 (доб. 575).
Иван Сандрин ханшам потар
Авторы
Лух Авт
Темы