Лух Авт
Асэван ӆапатӆаюв, Тураман шавиӆаюв!
Хасям сютсяты хатӆатан округ ӆоватан хуӆ веӆпасӆаты ёх емаӊ хатӆат мантсат. Кашӊ хуӆ веӆпасӆаты пана ун кусяйт ёхтыӆысат, хуӆ мосятты хоятат пеӆа мойӆапса ясаӊан ястасат. Рупитты ёх ишакты нэпекатан юкантсайт па мойӆаптасайт. Ӆорвош районан тампуш хуӆ мосятты мохет Аканьлейман, Ӆорвошан па Хашкуртан уйтантысат.
Округ хуват ярсот пеӆа хут хуӆ веӆпасӆаты па ветхосьяӊ хуӆ ӆэсятты таха уӆ. Кат сёрс арат хуӆ веӆпасӆаты хоят рупитаӆ. Хасям вет таӆ сыс кашӊ таӆ хуӆ веӆты ёх яӊ сёрс тонна хуӆ мосятӆат.
Уйт ӆор тыӆащ 10-мет хатаӆан Ӆорвош куртан «Горковской» рыбозавода ӆуӊтасты хоятат емаӊ хатӆэӆ постасэӆ. Мойӊ, куртаӊ па хуӆ веӆпасӆаты ёх ар хуӆ веӆты тахайт эӆты яха уйтантысат. Няврэмӆаӆ, рутӆаӆ пиӆан ёхтыӆысат.
Ханты хоятӆув катра пора эӆты хуӆ веӆман уӆӆат. Там хатӆ унты таӆаӊ хоттэӆатан си вер тувман рупитӆат. Си хатаӆан мет апраӊшак, каркамшак хоятат ишакты нэпекатан постасайт па мойӆаптасайт. Ӆув кутэӆан Вячеслав Устинович Тояров, Ӆоркурт рыбоучастка ӆуӊтасман уӆ. Мет воӆаӊ нэпекан — Хон мув сельской хозяйство Министерства эӆты Почётной грамотайн юкантса.
Округ хуват вой-хуӆ веӆпасӆаты хоятат ураӊан яӆпитам верат ӆэсятсайт. Хуӆ веӆпасӆаты ёх ияха ёхатмеӆ пуляӊ, Ӆорвош район шимӆаӊ мир ёх департаментан рупитты хоятат, хопан яӊхты порайн ӆуматты жилетатан па хуӆ шарытты хошапан масайт.
Емаӊ хатӆа ёхтам ёх кеша ӆэтотаӊ пасан ӆарпитыса, эпӆаӊ хошъйиӊк кавартыса, каш па касапсайт ӆэсятысайт. Хуӆ веӆпасӆаты ёх кутан «Мет воӆаӊ хуӆ веӆпасӆаты хоттэӆ» касапса верман ус. Оӆаӊ тахая Вениамин Максимович па Ирина Константиновна Питласовӊан этсаӊан. Ӆув хольмаӊ моӆтас таӆ хуӆ веӆпасӆыман рупитсаӊан. Кашӊ касапсайн касты хоятат ишакты нэпекан па охан мойӆаптасайт.
Муӊ па хуӆ мосятты ёх хоятата па нэӊата хошам ясаӊ китӆув. Веськата уӆаты, хоӆапӆын аршак хуӆан ат хойӆайт, рупатайн кентат ат манаӆ. Тумтак ёш, тумтак кур!
Альбина Тырлина ханшам потар
Авторы
Лух Авт
Темы